Foto: ©RIA Novosti
Qyrǵyzstan prezidenti Sadyr Japarov Reseidiń Ýlianovsk oblysynda jol apaty saldarynan otandastarynyń qaza bolýyna bailanysty halyqqa úndeý jasady. Úndeý mátini prezident saitynda jariialanǵan, - dep habarlaidy Tengrinews.kz.
Japarov Resei Federatsiiasynyń Ýlianovsk oblysynda bolǵan oqiǵa árbir qyrǵyzstandyqty eleń etkizgenin, orny tolmas qaza barshanyń júregine qaiaý salǵanyn aitty.
"Otandastarymyzdyń jol-kólik oqiǵasyna ushyraǵany týraly habardy úlken qaiǵymen qabyldadyq.
Qaza bolǵandardyń týystarynyń qaiǵysyn túsinemin jáne bólisýge daiarmyn, olarǵa qazir óte qiyn. Mundai jaǵdailarda janashyr sózderdi aitý qiyn. Soǵan qaramastan, apat saldarynan qaza bolǵandardyń týystary men jaqyndaryna kóńil aitamyn", - dedi Qyrǵyzstan prezidenti.
Onyń aitýynsha, apattan qaza tapqandar men zardap shekkenderdiń týystary men jaqyndaryna kómek kórsetiledi. Japarov bul másele óziniń jeke baqylaýynda bolatynyn qadap aitty.
"Qurmetti otandastar, bul qaiǵyly oqiǵa barsha halyq úshin úlken qaiǵy, osyǵan bailanysty 23 tamyzdy Qyrǵyzstan Respýblikasy aýmaǵynda Jalpyulttyq aza tutý kúni dep jariialaimyn", - dep túiindedi sózin Sadyr Japarov.
Reseidiń Ýlianovsk oblysynda bolǵan jol-kólik oqiǵasynda 16 adam qaza tapty, onyń 14-i Qyrǵyzstan azamattary. Úsh qyrǵyzstandyq aman qalǵan. Olardyń jaǵdaiy aýyr dep baǵalanyp otyr, dep jazady 24.kg.
Shaǵyn avtobýs eki júk kóligi arasynda qysylyp qalǵan. Adam ólimine sebepker bolǵan júk kóliginiń júrgizýshisi de qaza bolǵan.
