Búgin Túrkistan oblysynyń ortalyǵy - Túrkistan qalasynda bilim berý qyzmetkerleriniń Tamyz keńesi ótti. Jiynǵa aýdandyq jáne qalalyq bilim bólimderiniń basshylary, ustazdar, bilim salasynyń ardagerleri, oblystyq máslihat depýtattary jáne óńir basshysy Janseiit Túimebaev qatysty, dep habarlaidy oblystyq ákimdiktiń baspasóz qyzmeti.
Keńesti oblys ákiminiń orynbasary Ulasbek Sádibekov júrgizip otyrdy.
Jiynda Túrkistan oblystyq bilim basqarmasynyń basshysy Isatai Saǵyndyqovtyń 2017-2018 oqý jylynda atqarylǵan jumystary men aldaǵy mindetter týraly baiandamasy tyńdaldy.
Onyń aitýynsha, biyl óńirdiń bilim berý salasyna 262 mlrd. 24 mln. teńge qaralyp, qarjy kólemi 2017 jylmen salystyrǵanda 6 mlrd. 15 mln. teńgege ulǵaiǵan. Biyl oblys boiynsha birinshi synypqa 55385 oqýshy keledi. Iaǵni, mektepke keletin oqýshy sany 19 myńǵa artqan. Demografiialyq ósimge bailanysty 2018-2025 jyldary aralyǵynda óńirde 184 mektep salý qajettiligi týyndap otyr. Biyl bilim berý salasyna qajetti 83 nysannyń qurylysy qolǵa alynǵan. Onyń 40-y jyl sońyna deiin paidalanýǵa beriledi. Nátijesinde 9 apatty, 5 úsh aýysymdy, 13 yńǵailastyrylǵan jáne oryn tapshylyǵy baiqalǵan 10 mekteptiń máselesi sheshiledi. Sondai-aq 3 kolledjdiń de ǵimaraty jańarady. Mektepterdi oqýlyqpen qamtý, qysqy maýsymǵa ázirleý jumystary da oidaǵydai. Biyl UBT-ǵa óńirdegi 25504 túlektiń 16181- qatysyp, olardyń ortasha baly 79,6-ny quraǵan. Biyl Túrkistan oblysyndaǵy mektepterde 474 myńǵa jýyq oqýshy bilim alady.
Keńeste bilim berý salasyndaǵy izdenister men jańa mindetter, «Rýhani jańǵyrý» baǵdarlamasy boiynsha qolǵa alynǵan jumystar týraly birneshe ustaz-ǵalym baiandama jasap, tájiribelerin bólisti.
Ustazdardyń oi-pikirlerin tyńdaǵan Túrkistan oblysynyń ákimi Janseiit Túimebaev bilim salasy Elbasynyń basty nazarynda turǵanyn atap ótti.
- Muǵalim - qasietti uǵym ári kieli tulǵa. Ulaǵatty ustazdardyń aldynda búkil adam balasy qurmetpen bas iedi. Biylǵy Tamyz keńesi erekshe tarihi kezeńde ótip jatyr. Elbasy Jarlyǵymen Túrkistan oblysy qurylyp, onyń ortalyǵy bolyp Túrkistan qalasy bekitildi. Iasaýidei babamyz, Abylai han bastaǵan qazaqtyń 21 hany jatqan, qazaqtyń qaimaqtary máńgi qonys tapqan Túrkistannyń tarihyn ustazdar kaýymy oqýshylarǵa úiretýi kerek. Barlyq aýdan jáne qala ákimderine muǵalimderdiń jaǵdaiyna muqiiat qaraýdy, olardyń áleýmettik máselelerin barynsha sheshý jóninde tapsyrma beremin. Ustaz qairatty bolsa, eńsesi biik bolsa ǵana myqty shákirt tárbieleidi. Budan bylai muǵalimderdi jónsiz jumsaý, óz mindetterine kirmeitin sharýalarǵa jumsaý toqtatylýy kerek. Ustazdardyń jaǵdaiyn kóterý máselesi Úkimet tarapynan da nazarǵa alynyp keledi. Sondyqtan bárimiz birlesip otanshyl, namysty urpaq tárbieleýge, Túrkistandy damytýǵa atsalysaiyq. Jii kezdesi turaiyq. Ustazdar qaýymyna qoldaý kórsetýge daiynbyz. Aldaǵy jańa oqý jylynyń tabystary men jetistikteri mol, qýanyshtary kóp bolsyn! - dedi Janseiit Túimebaev.
Túrkistan tórindegi tarihi Tamyz keńesinde oblys ákimi bir top ustazdady marapattady. Atap aitsaq, 5 adamǵa «Oblysqa sińirgen eńbegi úshin» medali tapsyrylsa, 10 pedagogqa oblys ákiminiń gramotasy men Alǵys haty tapsyryldy. Sonymen qatar, 20 adam QR Bilim jáne ǵylym ministrliginiń marapattaryna ie bolsa, 5 ustaz oblystyq máslihattyń gramotasymen marapattaldy.
