«Saint Louis Chess Club» Jansaia Ábdimálikti «Cairns Cup 2019» áielder týrnirine qatysýǵa shaqyrdy.
Uiymdastyrýshylar jasynan tys álemdegi úzdik 10 shahmatshyny tańdap, AQSh-qa jeke shaqyryp otyr, dep habarlaidy "Ult aqparat".
Jas shahmatshynyń aitýynsha, bul kútpegen oqiǵa boldy.
«Shyny kerek, osy týrnirge shaqyrtý alamyn dep kútpep edim. «Saint Louis Chess Club» tujyrymy boiynsha álemniń úzdik on shahmatshysynyń qataryna kirip, onda Qazaqstannyń namysyn qorǵaý úlken jaýapkershilik», - deidi Jansaia.
«Cairns Cup 2019» týrniri alǵash ret ótkizilgeli otyr, aldaǵy ýaqytta ol dástúrli týrnirler qataryna qosylady. Partiialar 2 aqpan kúni Missýri shtatynyń Sent-Lýis qalasyndaǵy áigili Chess Club klýbynda bastalady. Sportshylar onda ainalym júiesi boiynsha upai jinaidy.
«Bul eń joǵary deńgeidegi jarys bolmaq. Jansaia oǵan Qazaqstan atynan qatysatyn birden-bir sportshy ári týrnirdiń eń jas qatysýshysy. Degenmen onyń álem chempionattaryndaǵy oiyndary Jansaianyń tájiribeli qarsylastarynan qaimyqpaitynyn talai ret kórsetti», - deidi Qazaqstannyń Shahmat federatsiiasynyń atqarýshy direktory Irina Grishenko.
Aita keteiik, týrnirdiń júlde qory 150 myń dollar. Bul áielder arasyndaǵy ainalym júiesinde ótetin jarystar tarihynda buryn-sońdy bolyp kórmegen soma. Bir ereksheligi, oǵan qatysýshylardyń eshqaisysy da syiaqysyz qaitpaidy. Birinshi orynǵa 40 myń dollar, al onynshy orynǵa 5 myń dollar tigilgen.
Eske sala keteiik, Jansaia Ábdimálik shahmattyń barlyq túrinen 20 jasqa deiingiler arasynda álem reitinginde kósh bastap tur.
