Nur-Sultan qalasynyń bas sanitarlyq dárigeri Janna Pralieva elordanyń nelikten «qyzyl» aimaqqa engizilgenin aityp ótti, dep habarlaidy QazAqparat.
«Qyrkúiek aiynda jáne qazan aiynyń birinshi onkúndiginde qaladaǵy epidemiologiialyq jaǵdai turaqty dep baǵalandy. Biraq qazan aiynyń ekinshi jartysynan bastap reprodýktivti sannyń (R) birlikten asyp ketýi baiqaldy. R sanynyń qazan aiynda 11 kún boiy jáne qarasha aiynda 6 kún boiy tómendedi. Qalǵan ýaqytta R sany 1-den asty, sondyqtan qala «sary aimaqta» boldy», - dedi Janna Pralieva qala ákimdiginde ótken baspasóz máslihatynda.
Onyń aitýynsha qazan aiymen salystyrǵanda ózdigimen meditsinalyq qyzmetke qaralyp anyqtalǵandar (aptasyna 18-den 213 jaǵdaiǵa deiin) jáne úi oshaqtarynda qatynasta bolyp aýyrǵandar (aptasyna 15-ten 217 jaǵdaiǵa deiin) sany kóbeigen. Ótken aptada syrqattaný kórsetkishi 100 myń turǵynǵa shaqqanda 51,0-den asqan.
«10 jeltoqsannan bastap qala «qyzyl aimaqqa» aýysty. Bul birinshi kezekte qala turǵyndarynyń aldyn alý sharalaryn saqtamaýyna bailanysty bolyp otyr», - dedi ol.
