Jankúierler Dimash Qudaibergenniń qatty aýyryp qalǵanyn jazyp jatyr, - dep habarlaidy kaz.tengrinews.kz tilshisi.
Instagram jelisinde Dimash Qudaibergenovtiń fan-paraqshalary ánshiniń I Am a Singer baiqaýynyń segizinshi kezeńinde sahnaǵa tamaǵy aýyryp shyqqanyn jáne ánin qarlyǵyńqy daýyspen oryndaǵanyn jazǵan. Aitýlarynsha, ánshi bul kezeńde besinshi oryn alǵan.
"Dostar, Dimash 8-shi týrda 5-oryn aldy. Daýsyn joǵaltyp alǵanyn jáne tamaǵy aýyrǵanyn esepke alsaq, bul óte jaqsy kórsetkish. Ol osy jaǵdaiyna qaramastan sahnaǵa shyqqan naǵyz ánshi! Tipti án aitýdan bas tartsa da, men kerisinshe, oǵan qoldaý bildirer edim! Oǵan eki ret ekpe saldy. Sahnada aýyryp turǵany baiqaldy. Biz tamaǵymyz aýyrsa, án aitý bylai tursyn, sóilei de almai qalamyz. Al ol naǵyz batyr! Bastysy júlde emes, densaýlyǵy!", - dep jazǵan Dears ókilderi. Soǵan qaraǵanda, baiqaýdyń segizinshi kezeńiniń túsirilimderi búgin ótken.
Buǵan qatysty kóptegen qoldanýshy ánshige myqty densaýlyq tilep jatyr.
Óz kezeginde Dimash Qudaibergenniń PR-direktory Alpamys Sharimov bul málimetti rastap otyr. "Biraq kópshilik jazyp jatqandai daýsyn joǵaltyp alǵan joq. Ol sýyq tiip, qatty aýyryp qaldy. Klimattyń aýysýy áser etti. Jazyldy dep aita almaimyn. Emdelip jatyrmyz", - degen ol Dimash Qudaibergenniń segizinshi kezeńde sahnaǵa shyǵyp, án aitqanyna tańǵalǵanyn jetkizdi.
© Instagram.com/dimash_dears_
"Men onyń án aityp shyqqanyna tań qaldym. 5-oryn degen negizi jaqsy nátije. Bul konkýrsta 1, 2, 3, 4, 5, 6, 7, 8 oryndar beriledi. Olimpiada oiyndaryndaǵydai 1, 2, 3-oryndar emes", - dep habarlady ánshiniń ókili.
Aita keteiik, aldaǵy senbide Hunan TV arnasynda Dimash Qudaibergenniń I Am a Singer baiqaýynyń jetinshi kezeńdegi óneri kórsetiledi. Bul kezeńde ol "Daididaý" ánin Qazaq ulttyq óner ýniversiteti ulttyq aspaptar ansambliniń súiemeldeýimen oryndaidy. Ánshiniń ókili Alpamys Sharimov aldaǵy kezeńge ázirlep otyrǵan bir tosynsyidyń baryn aitqan bolatyn.
