Qazaqstandyq kásipqoi boksshy (7-0, 2 KO) Jánibek Álimhanuly endi ringke Qazaq style laqap atymen shyǵatyn bolady. Bul týraly boksshy Instagram-daǵy paraqshasynda jazdy, dep habarlaidy QazAqparat tilshisi.
«Kásipqoi boksta ár boksshynyń laqap aty bar. Bireýleri laqap atty ózi tańdaidy, endi bireýlerge jankúierler qoiady. Ózderińiz jaqsy bilesizder meni Amerikada jankúierler, bapkerler Qazaq style dep ataidy. Qazaqstandyq jankúierler de osylai atap ketti. Kóp oilanbastan laqap atymdy QAZAQ STYLE dep ataýdy jón kórdik. Onsyz da sizder solai ataisyzdar. Biz jái ǵana resmilendirip qoiaiyq. Boksrekke (BoxRec nemese boxrec.com — kásipqoi boksshylar týraly málimetter, reitingter saity) engizip qoidyq. Buiyrtsa QAZAQ STYLE-dy álemge tanytýǵa bar kúshimizdi salamyz! Jeńiste júzdeseiik!», - dep jazdy boksshy.
Eske sala ketsek, sońǵy aiqasynda Jánibek Álimhanuly 27 ret jeńiske jetken qarsylasyn nokaýtqa túsirgen bolatyn. Orta salmaqtaǵy on raýndqa sozylǵan aiqasta Álimhanuly kanadalyqty besinshi raýndta tehnikalyq nokaýtpen jeńdi.
