Qostanai oblysynyń Jangeldin aýdany Ahmet Baitursynuly aýdany bolyp ózgere me? Májilis depýtattarynyń bul saýalyna QR Premer-Ministriniń orynbasary Eraly Toǵjanov jaýap berdi, dep habarlaidy QazAqparat.
«Ahmet Baitursynulynyń 150 jyldyq mereitoiy jóninde kelesi jumystar atqarylýda. Qazaqstan Respýblikasy Prezidentiniń 2021 jylǵy 19 maýsymdaǵy №624 Jarlyǵyna sáikes Ahmet Baitursynulynyń 150 jyldyq mereitoiyn daiyndaý jáne ótkizý jónindegi memlekettik komissiia qurylyp, Qazaqstan Respýblikasynyń Memlekettik hatshysy atalǵan komissiia tóraǵasy bolyp belgilendi. 2021 jylǵy 27 qazanda Qazaqstan Respýblikasynyń Memlekettik hatshysy tóraǵalyǵymen ótken Memlekettik komissiia otyrysynda Ahmet Baitursynulynyń 150 jyldyq mereitoiyn daiyndaý jáne ótkizý jónindegi jalpyrespýblikalyq jospar bekitildi. Josparda Ahmet Baitursynulynyń shyǵarmashylyq muralaryn halyqaralyq, respýblikalyq jáne óńirlik deńgeide nasihattaý maqsatynda ǵylymi, mádeni-aǵartýshylyq, aqparattyq-imidjdik is-sharalar qamtylǵan. Atalǵan josparda depýtattyq saýalda kóterilgen birqatar máseleler qarastyrylǵan», - dedi Eraly Toǵjanov jaýabynda.
Vitse-premerdiń atap ótýinshe, Qostanai oblysy Jangeldi aýdanynyń Ahmet Baitursynuly aýylyndaǵy tulǵa ómirge kelgen úidi qalpyna keltirip, jádigerlermen tolyqtyryp, mýzei-úi etip ashý jáne Baitursyn áýletiniń qorymyn qorshaýyn jańartý, Qostanai oblysynyń aýmaǵynda Ahmet Baitursynulynyń memorialdyq keshenin salý, Ahmet Baitursynuly aýylyna baratyn joldy kúrdeli jóndeýden ótkizý, Qostanai oblysyndaǵy «Ahmet Baitursynuly men Mirjaqyp Dýlatulynyń ádebi murajaiyn», Almaty qalasyndaǵy «Ahmet Baitursynuly mýzei-úiin» abattandyrý jumystaryn júrgizý josparda kózdelgen.
«Sondai-aq Qostanai oblysyndaǵy Ahmet Baitursynulynyń dúniege kelgen Sarytúbek qonysy aimaqtyq mańyzy bar kieli jerler tizimine engizilgenin habarlaimyz. Ahmet Baitursynuly mýzei-úii Almaty qalasy máslihatynyń 2021 jylǵy 31 mamyrdaǵy № 51 sheshimine sáikes jeke menshikten kommýnaldyq menshikke alyndy. Atalǵan josparǵa sáikes, osy jyly Ahmet Baitursynulynyń mýzei-úiiniń ǵylymi-restavratsiialyq jumystary úshin ǵylymi-jobalaý qujattamasy ázirlenetin bolady. Sizder usynyp otyrǵan Jangeldin aýdanynyń atyn ózgertý, Qostanai qalasyndaǵy áýejaiǵa Ahmet Baitursynulynyń atyn berý máselesi qoǵamnyń pikirin eskerý maqsatynda jergilikti halyqpen, aýyldyq okrýgpen, qoǵamdyq keńes múshelerimen, máslihat depýtattarymen, ardagerler keńesimen talqylaý jumysy, kezdesýler uiymdastyrylǵannan keiin nátijesine qarai qoldanystaǵy zańnama talaptaryna sáikes iske asyrylatyn bolady», - dedi ol.
Úkimet basshysynyń orynbasary Ahmet Baitursynulynyń esimin oblys ortalyqtaryndaǵy mektepterge, ortalyq kóshelerge (dańǵyldarǵa) berý máselesi jergilikti jerlerdiń onomastikalyq komissiia otyrystarynda qaralatyndyǵyn aitady.
«Bul maqsattaǵy jumystar zańnamada belgilengen tártipke sáikes barlyq óńirlerdiń ákimdikteri tarapynan iske asyrylady. Sonymen qatar Ahmet Baitursynulynyń eskertkishin ornatý máselesi de Nur-Sultan, Almaty, Shymkent qalalarynda jáne oblys ortalyqtarynda qoldanystaǵy zańnama talaptaryna sáikes júzege asyrylady. Al Túrkiianyń Ankara qalasynda, Reseidiń Orynbor qalasynda Ahmet Baitursynulynyń eskertkishin ornatý máselesin qarastyrý atalǵan josparda qamtylǵan. Josparda Ahmet Baitursynulynyń muralaryn túrki álemine nasihattaý maqsatynda TÚRKSOI uiymynyń, otandyq jáne sheteldik ziialy qaýym ókilderiniń qatysýymen Ystambul qalasynda dóńgelek ústel, fotokórme uiymdastyrý, Túrkistan qalasynda Halyqaralyq túrkitanýshylar kongresin ótkizý, sonymen qatar Halyqaralyq Túrki akademiiasynyń uiymdastyrýymen Baký qalasynda «Baký kongresi jáne Ahmet Baitursynuly» atty konferentsiia, Orynbor jáne Tashkent qalalarynda mereitoiǵa arnalǵan is-sharalardy ótkizý qarastyrylǵan», - dedi Eraly Toǵjanov.
