Búgin Almatyla belgili qoǵam qairatkeri, jýrnalist Janbolat Mamai jaqtastarymen birge baspasóz jiynyn ótkizdi. Jiyndy áleýmettik jelide tikelei efirde kórsetip, jańa saiasi partiia quratynyn málimdedi, – dep habarlaidy Ult aqparat.
«Dál qazir bizde tirkelgen partiialar bolǵanymenen shynaiy ózgeristi qalaityn partiia joq. Bir ǵana partiia bar, ol – «Nur-Otan». Qalǵandary sonyń klondary. Alda kele jatqan sailaýǵa qatysyp, kúsh bolatyn partiia joq. Biz alda qiyndyq bolatynyn bilemiz. Oǵan daiynbyz. Óz sózimizde turatyndyǵymyzǵa sóz beremin. Áriptesterimizben kelisip, saiasi partiia qurýdy kózdep otyrmyz. Partiia qurý jái ádilet ministrligine tirkelý emes. Ol múddeles azamattardyń bas qosyp, qoǵamdy ózgertip, bilikke kelý. Biz osyǵan daiynbyz. Búgingi biliktiń saiasatyna kóńili tolmaityn, elde ózgeris bolǵanyn qalaityn azamattardyń bári bizge qosyla alady. Bizge elbasy týraly, qaýipsizdik keńesiniń tóraǵasy týraly zańnyń keregi ne? Olardyń bárin ózgertýimiz kerek. Kerek zańdarǵa qoldanysta júrýi shart» dedi Janbolat Mamai.
Sondai-aq, táýelsiz jýrnalist qoǵamǵa ózgeris kerek ekenin, beibit sherýge shyǵyp, qamalǵan saiasi tutqyndar bosatylýy kerek ekenin atap ótti.
«Kez kelgen alańǵa shyqqan adamdy qamap, ákimshilik jaýapqa tartyp jatyr. Bul durys emes. Beibit sherý týraly zań ózgerýi tiis. Sodan keiin konstitýtsiia týraly zań da ózgerýi kerek. Qazirgi zańmen eshteńe ózgermeidi. Elde bolyp jatqan jaǵdai bárimizdi alańdatyp otyr. Biz parlamenttik memleket bolýymyz kerek» dedi ol.
Esterińizge sala keteiik, Janbolat Mamaidyń ózi de 2017 jyly qamalyp, múlki tárkilenip, bir jyl boiy jýrnalistikamen ainalysýyna tyiym salynǵan bolatyn.
