Túrkistan oblysynyń ákimi Janseiit Túimebaev óńir imamdarymen kezdesip, birqatar ózekti máselelerdi talqylady. Kezdesý kezinde aimaqtaǵy dini ahýal turaqty ekendigin jetkizgen din salasynyń qyzmetkerleri atqarylǵan jumystarǵa toqtalyp, alda jasalatyn dini is-sharalar josparymen tanystyryp ótti, dep habarlaidy "Ult aqparat".
Basqosýǵa Qazaqstan musylmandary dini basqarmasy Túrkistan oblysy boiynsha ókil imamy Musabek Aqtamberdi men «Din máselelerin zertteý ortalyǵy» KMM direktorynyń mindetin ýaqytsha atqarýshy Mádi Besbaev, Jetisai aýdanynyń bas imamy Bekzat Syzdyqov pen Tólebi aýdanynyń bas imamy Samat Anarbaevtar qatysty. Olar oblys basshysyna dini ahýalǵa bailanysty óz usynys-pikirlerin bildirdi. Ózge aǵymdarǵa qarsy aǵartý jáne dini ekstremizmniń aldyn alýda júieli ister júrgizilip jatqanyn aityp, birneshe baǵytqa bólingen jumystardyń jai-kúiin baiandady. Óz kezeginde qoǵamdaǵy jastardyń tárbiesine airyqsha kóńil bólý kerektigin basa aitqan Janseiit Túimebaev imamdarǵa birneshe másele boiynsha tapsyrmalar berdi. Dini turaqtylyqty saqtaý maqsatynda aýdan qalalarda dástúrli dini baǵyttaǵy úgit-nasihat jumystaryn jalǵastyrýdy tapsyrdy.
«Halyqpen meiilinshe tiimdi jumys jasaý úshin Elbasy barlyq jaǵdaidy jasap otyr. Balalar, jastar úshin kúndelikti jumys isteýimiz kerek. Janaza, as berý kezinde ysyrapshyldyqqa jol bermeýdi aityp kelemiz. Qazaq halqyna tán salt-dástúrler men ádet-ǵurypty nasihattap, soǵan mán berý mańyzdy», - dedi oblys ákimi.
