Parlament Májilisiniń jalpy otyrysynda depýtat Ǵalym Ámireev negizgi áleýmettik mańyzy bar azyq-túlik ónimderiniń baǵasynyń ósýi máselesine qatysty QR Premer-Ministriniń orynbasary Roman Skliardyń atyna saýal joldady, dep habarlaidy QazAqparat.
«Búgingi tańda bizdiń sailaýshylardy tolǵandyratyn mańyzdy máselelerdiń biri - negizgi áleýmettik mańyzy bar azyq-túlik ónimderiniń, ásirese nannyń baǵasy. Bul másele depýtattyq saýaldarda birneshe ret kóterilgenmen, áli de óz sheshimin tappai otyr. Biylǵy kóktem-jaz ailarynda sábiz ben kartop baǵasynyń 500-600 teńgege deiin ósýi úlken rezonans týdyrdy. Alaida, Aýyl sharýashylyǵy ministrligi tarapynan eshqandai tujyrym jasalǵan joq. Sońǵy ýaqytta negizgi áleýmettik mańyzy bar azyq-túlik ónimderi baǵasynyń ósýine qatysty máseleler kóbirek kóterilip keledi, halyq baǵalardyń rettelmeitinine, tipti keide ártúrli bolatynyna shaǵym jasaýda. Mysaly, eń tanymal 1-surypty un 150-200 teńge aralyǵynda satylady jáne odan ári ósý úrdisi bar. Al un baǵasy jazdyń ózinde 120-130 teńge deńgeiinde boldy», - dedi Ǵ. Ámireev.
Onyń aitýynsha, biyl qazaqstandyq aýyl sharýashylyǵy taýaryn óndirýshiler úshin qurǵaqshylyq saldarynan túsimniń tómendigi eleýli soqqy boldy. Aldyn ala boljam boiynsha biz 30% - ǵa deiin ónimge qol jetkize almaimyz.
«Sonymen qatar, ýákiletti organdardyń jaýapsyzdyǵynan biz janar-jaǵarmaidyń, dizel otynynyń joǵary baǵasyn baiqaimyz. Litrine 300 teńgege deiin jetip, kei ýaqytta eldiń janarmai beketterinde tapshy da bolyp qalady. Munyń bári ekonomikalyq diversiiaǵa óte uqsas, al bul - Energetika ministrliginiń jaýapkershiligi. Sondai-aq, tyńaitqyshtardyń, aýyl sharýashylyǵy tehnikasy qunynyń jyl saiynǵy ósýin de atap ótý qajet. Barlyq osy faktorlar jiyntyǵynda astyq baǵasyna áser etti. Bireýler úshin janar-jaǵarmai baǵasynyń kúrt ósýi normaǵa, jaýapsyzdyq normasyna ainaldy. Bul únemi, dálirek aitqanda kóktemgi egis jumystary men egin jinaý kezinde oryn alyp keledi. Bul týraly depýtattar da birneshe ret másele kótergen bolatyn, biraq burynǵy jartas sol jartas kúiinde, bul aýylsharýashylyq mamandary úshin eń jaýapty sátte qasaqana jasalatyndai áser qaldyrady», - dedi depýtat.
«Eger jaqyn arada biz halyqty ústelinde bolatyn basty ónimmen – qazirdiń ózinde baǵasy qarqynmen ósip jatqan nanmen, makaronmen jáne jarma ónimderimen qamtamasyz etý máselesin sheshpesek, onyń saldary biylǵy kóktem men jaz mezgiline qaraǵanda odan da aýyr bolýy múmkin. Joǵaryda baiandalǵandy eskere otyryp, taýar naryqtarynda bidaidyń jetkilikti kólemin satyp alý boiynsha interventsiia júrgizý úshin «Azyq-túlik kelisim shart korporatsiiasy» AQ men turaqtandyrý qorlaryna Úkimet rezervinen qosymsha biýdjet qarajatyn bólý máselesin sheshýdi suraimyz. Bul keiinnen nan, jarma jáne makaron ónimderi baǵasynyń turaqtanýyn qamtamasyz etetin bolady», - dedi Ǵalym Ámireev.
