QR Parlamenti Senatynyń jalpy otyrysynda Energetika ministri Maǵzum Myrzaǵaliev elimizde oryn alǵan dizel tapshylyǵynyń basty sebebin atady, dep habarlaidy QazAqparat.
«Jalpy janar-jaǵarmai baǵasy rettelmeidi jáne osy janar-jaǵarmai baǵasyn talqylaý kezinde eki máseleni este ustaýymyz kerek. Birinshisi - álemdik brend baǵasyna táýeldilik. Ekinshiden, kórshiles elderde qalyptasqan baǵadan qatty aiyrmashylyq bolmaýy tiis. Biyl elimizde dizel otynynyń tapshylyǵy boldy. Onyń basty sebebi - kórshi eldermen salystyrǵan baǵa aiyrmasynyń óte joǵary bolýy. Endi Memleket basshysynyń tapsyrmasyna sáikes júieli ózgerister ázirlep jatyrmyz», - dedi ministr Senat depýtattarynyń saýalyna orai.
Maǵzum Myrzaǵalievtiń atap ótýinshe, júieli ózgeristerde elimizdegi úsh munai óńdeý zaýytynyń josparly jáne jospardan tys jóndeý jumystarynyń merzimderin naqtylaý jáne reglamentteý kózdeledi.
Ekinshiden, elimizde memlekettik materialdyq qor qalyptastyrý, úshinshiden janar-jaǵarmaidy baqylaý qolǵa alynady.
Sonymen qatar ár munai bazasynda tiisti qural-jabdyqtyń bolýy qadaǵalanady.
«Osy máselerdi zerttep jatyrmyz, qolǵa aldyq. Jyldyń sońyna deiin naqty usynystar engizemiz», - dedi ol.
