Jańaózenniń halqy soltústik óńirlerge kóshýge qulyqsyz. Mańǵystaý oblysynyń ákimi Nurlan Noǵaev ortalyq kommýnikatsiialar qyzmetinde osyndai málimet aitty, dep habarlaidy QazAqparat.
«Jańaózen qalasynyń myńdaǵan halyqty asyraý, laiyqty jalaqymen qamtamasyz etýge shamasy jetpeitini týraly ýájder bar. Qala turǵyndary soltústik óńirlerge kóshýge qalai qaraidy? Arnaiy baǵdarlama jasap, tiimdi joldar usyný mehanizmderin qarastyryp jatyrsyzdar ma?», - dep surady jýrnalist brifingide.
«Negizi Jańaózen qalasy kezinde osy attas ken ornynyń janyndaǵy vahtalyq kent retinde uiymdastyrylǵan eldi meken bolatyn. Ol jerde jospar boiynsha Jańaózen kenishi men mańyndaǵy ken oryndaryn igerý úshin ary ketse, 60-70 myń adam turýy kerek. Qazirgi tańda Jańaózen qalasynda, qasyndaǵy eldi mekenderde 160 myńnan astam adam turady», - dedi Nurlan Noǵaev.
Aitýynsha, qazir munda infraqurylymdy, jylý, elektr jaryǵyn jetkizý máseleleri, árine, birtindep sheshilip kele jatyr. Degenmen, qaladaǵy halyqtyń bir bóligin eńbek kúshi tapshy óńirlerge kóshirý máselesi áli de ózekti.
«Siz aitqandai, eńbek qoly azdaý jerlerge kóshirý jumystary júrip jatyr. Óz tarapymnan osy múmkindikti paidalanyp, atalǵan máselege alańdaityn azamat retinde ózińizden, ǵalymdardan, sarapshylardan utymdy usynystar túsip jatsa, qaraýǵa ázir ekenimdi aitqym keledi.
Soltústikke kóshkisi keletin azamattardyń kádimgidei nópiri bar dep aita almaimyn. Sebebi Jańaózende tabiǵat jyly. Ol jerdegi turmystyq jaǵdai, keibireýleriniń jalaqysy az bolǵanymen aǵaiyn-týyspen toptasyp turýdy ádetke ainaldyrǵan adamdar kóp. Jańaózendegi 160 myń adamnyń 80 paiyzy elimizge kelgen qandastardan quralǵan. Meniń oiymsha, psihologiialyq senim bolý úshin jáne buryn kóship kelgen memleketterinde toptasyp ómir súrýge beiimdelip qalǵandyqtan bir-birine qoldaý bolamyz degen túsinikpen alysqa ajyrap ketkisi kelmeitin siiaqty», - dedi oblys ákimi.
Sondai-aq, ol qazir jańaózendikterdi ózge óńirlerge kóshirý jumystaryna qoǵam belsendileri men qoǵamdyq uiymdar ainalysyp jatqanyn atady.
«Bul bir kúndik sharýa emes. Mysaly, Jańaózende bir kásipker Qostanai oblysyndaǵy 30 eldi mekenge 130 otbasy kóshirip aparǵysy keletinin aityp, usynys qoidy. Sol jaqta jeri bar eken. «Aldylaryna mal salyp bereiin. 7 jylǵa deiin eshqandai qaitarym talap etpeimin. Úi bereiin, sol jerde turyp jumys istesin» degen shartyn qoidy. Sol 100 adamdy taba almai otyrmyz.
Soltústikke kóshirý jónindegi memlekettik baǵdarlama kezinde Mańǵystaýdy da qamtydy. Ol jerge barǵan azamattardyń birazy qalyp, birazy keri qaitty. Aýa raiynyń qolaisyzdyǵy, qystyń sýyqtyǵy, gazdyń joq bolýy jaqpaǵan», - deidi aimaq basshysy.
