Mańǵystaý oblysyndaǵy áleýmettik-ekonomikalyq jaǵdaidy qaraityn Úkimettik komissiiany QR Premer-Ministriniń orynbasary Eraly Toǵjanov basqaratyn boldy. Bul týraly QR Premer-Ministriniń baspasóz qyzmeti habarlady, dep jazady QazAqparat.
«Komissiiany E.Toǵjanov basqarady. Erteń tańerteń QR Premer-Ministriniń orynbasary E.L.Toǵjanov, QR energetika ministri M.M. Myrzaǵaliev jáne Bsákelestikti qorǵaý jáne damytý agenttiginiń tóraǵasy S.M.Jumanǵarin Aqtaýǵa ushady», - delingen habarlamada.
Buǵan deiin QR Premer-Ministri Asqar Maminniń ókimimen Mańǵystaý oblysyndaǵy áleýmettik-ekonomikalyq jaǵdaidy qaraý úshin Úkimet komissiiasy qurylǵanyn jazǵan bolatynbyz.
Eske salsaq, Memleket basshysy Qasym-Jomart Toqaev Twitter-degi suiytylǵan gaz baǵasynan bastalǵan paraqshasynda Jańaózendegi jaǵdaiǵa qatysty jazba jariialaǵan bolatyn.
«Úkimetke Jańaózendegi jaǵdaidy ekonomikalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tiis. Azamattardyń jergilikti jáne ortalyq bilik organdaryna talabyn ashyq aitýǵa quqyǵy bar, biraq, bul zańǵa, naqtyraq aitqanda, beibit sherýler týraly zańǵa sáikes júzege asyrylýy kerek», delingen jazbada.
