Mańǵystaý oblysynyń ákimdigi Jańaózen turǵyndarynyń mitingige shyǵýyna sebep bolǵan gaz baǵasynyń qymbattaýyna qatysty túsinikteme berdi.
Osy jyldyń 1 qańtarynda suiytylǵan gaz 100% elektrondy saýda ádisi arqyly satylyp otyr. Bul suiytylǵan gaz baǵasynyń qymbattaýyna alyp keldi, dep málimdedi Mańǵystaý oblysy energetika jáne TKSh basqarmasynyń basshysy Berdibek Qartbaev. Bul týraly Lada.kz jazdy, dep habarlaidy Sputnik Qazaqstan.
"Búginde elektrondy saýda alańdarynda kásipkerlerdiń operatsiialyq shyǵyndaryn eseptemegende suiytylǵan gazdyń bir litri 85 teńgeden satylyp otyr. Jalpy baǵany suranys pen usynysqa sáikes naryqtyń ózi túzedi. Ákimdik gaz baǵasyn retteýge qatyspaidy, óitkeni bul ónim básekelestik ortaǵa qatysty. Alaida jeke kásipkerler tarapynan baǵany negizsiz kóterý faktileri anyqtalǵan jaǵdaida Básekelestikti qorǵaý agenttiginiń departamenti ákimshilik shara qoldanady", - dedi Qartbaev.
Onyń aitýynsha, elektrondy saýdaǵa kóshý salanyń investitsiialyq tartymdylyǵyn arttyryp, suiytylǵan gazdyń ekonomikalyq turǵyda negizdelgen baǵasyn qalyptastyrady.
Naryqtaǵy elektrondy saýda týraly Qazaqstannyń energetika ministrligi de habarlaǵan bolatyn. 2022 jyldyń 1 qańtarynan bastap suiytylǵan munai gazynyń (SMG) saýdasy taýar birjalaryna 100% kóshirildi. Vedomstvo málimetinshe, bul naryqtyń barlyq qatysýshysy úshin teń jaǵdai týdyrady jáne suiytylǵan munai gazynyń qajetti kólemin óndirýshilerden tikelei satyp alýǵa múmkindik beredi.
"Elektrondy saýda alańdaryna (ESA) kóshkenge deiin suiytylǵan munai gazynyń baǵasy óndirýshiler úshin tiimsiz boldy. Sebebi ol óz qunynan tómen baǵada satyldy. 2022 jyldyń qańtaryndaǵy derek boiynsha jabdyqtaýshylar Mańǵystaý oblysy úshin óndirýshilerden 17 406 tonna suiytylǵan munai gazyn satyp aldy", - dep habarlady energetika ministrliginiń baspasóz qyzmeti.
20-24 jeltoqsan aralyǵynda elektrondy saýda alańynda bes saýda sessiiasy ótip, suranys pen usynys negizinde suiytylǵan munai gazynyń baǵasy qalyptasty. Osylaisha Mańǵystaý oblysyna suiytylǵan gaz jetkizýdiń qańtardaǵy ortasha kóterme baǵasy 133 126 teńge/tonna nemese 78 teńge/litr qurady.
Bul rette Aqtaý, Jańaózen qalalarynda, sondai-aq Mańǵystaý oblysynda bólshek saýda baǵasy 100-120 teńge/litr boldy.
Jalpy qańtardaǵy saýda sessiialary shtatty rejimde ótti, naryq mehanizmi óńirlerdiń suiytylǵan gazǵa tiisti kólemdegi suranysyn rettedi jáne qazirgi ýaqytta gaz aimaqtarǵa jóneltilip jatyr.
Berdibek Qartbaevtyń aitýynsha, elimizde ortasha eseppen alǵanda bir litr gazdyń quny 110 teńge, Atyraý oblysynda – 115 teńge, Oralda – 120 teńge, al Mańǵystaý oblysynda 95-115 teńge aralyǵynda bolyp otyr.
Eske salaiyq, buǵan deiin videoúndeý joldaǵan Jańaózen turǵyndary óńirde gaz baǵasy 120 teńgege deiin qymbattaǵanyn málimdedi. Olar eń tómengi jalaqy mólsherine sáikes baǵany 60 teńgege deiin tómendetýdi talap etti.
