Foto: Mańǵystaý oblysy ákimdiginiń baspasóz qyzmeti
Jańaózen qalasyna jumys sapary kezinde «QazMunaiGaz» UK AQ Basqarma Tóraǵasy Maǵzum Myrzaǵaliev 17 sáýirde kópqabatty turǵyn úidegi jarylys saldarynan kóz jumǵan jandardyń otbasyna baryp, óziniń jáne kompaniia atynan kóńil aitty, dep habarlaidy kompaniianyń baspasóz qyzmeti.
«Bul - óte aýyr jaǵdai. Sizderdiń qaiǵylaryńyzǵa ortaqpyz, myqty bolyńyzdar. Bastaryńyzǵa synaq túsken kezde biz shet qalmai, Prezidenttiń tikelei tapsyrmasymen baspanasyz qalǵan otbasylarǵa páter alyp berdik. Osyndai syn saǵatta sizder úshin qolymyzdan kelgendi jasap jatyrmyz», — dedi QMG basshysy kóz jumǵan turǵyndardyń týystaryna kóńil aita kele.
Kompaniia málimetinshe, tótenshe jaǵdai saldarynan baspanasyz qalǵan 9 otbasyǵa januiadaǵy adam sanyna bailanysty eki bólmeli 2 páter, úsh bólmeli 5 jáne bes bólmeli 2 páter satyp alynǵan.
Aita keteiik, 17 sáýirde tańǵy saǵat beste Jańaózende eki kireberisti 12 páterli eki qabatty turǵyn úide gaz qospasynyń jarylysy boldy. Órt shyqqan joq. Biraq jarylys saldarynan kireberistiń 150 sharshy metri opyrylyp qulady.
Tótenshe oqiǵa kezinde tórt adam – eki áiel, bir bala jáne bir er adam qaza tapty. Úide 12 páterdiń tórteýi jarylys saldarynan jermen-jeksen boldy.
