Qyzylorda oblysy Jańaqorǵan aýdanynda qar astynda qalyp qoiǵan 50-ge jýyq ýaq maly qyryldy, dep habarlaidy "Ult aqparat".
Tabiǵattyń tosyn qubylysy 14 naýryzda aýdannyń taý betkeiinde ornalasqan Súttiqudyq, Qosúienki, Qyrash aýyldyq okrýgterindegi sharýa qojalyqtaryna edáýir shyǵyn alyp keldi. Tekseris jumystarynyń barysynda 50-ge jýyq qoidyń qyrylǵany anyqtaldy.
«Tabiǵattyń tótenshe jaǵdaiyna bailanysty Jańaqorǵan aýdanynyń azamattyq qorǵaý garnizonynan 6 qyzmetker, 1 tehnika, aýdan ákimdiginen 8 qyzmetker, 4 tehnika jumyldyryldy. Qazir atalǵan maqsatta arnaiy komissiia quryldy», - dedi oblystyq tótenshe jaǵdailar departamenti bastyǵynyń mindetin atqarýshy Rýslan Qairaqbaev.
Naýryz aiynyń 12-13 naýryz aralyǵynda Jańaqorǵan, Shieli aýdandarynda aýa raiy kúrt qubyldy. Bul joldaǵy qozǵalysqa birshama qiyndyq alyp kelgen.
«Osyndai jaǵdaiǵa bailanysty uzyndyǵy 246 shaqyrymdy quraityn «Qyzylorda-Túrkistan» avtojoly eki márte jabyldy. Shieli, Jańaqorǵan aýdanynda 11 tehnika jumyldyryp, tazalaý jumystary júrgizilýde. Qazir kólik qozǵalysyna kedergi joq. Apattyq jaǵdai bolǵan joq», - dedi «Qazavtojol» UQ»AQ Qyzylorda oblystyq filialynyń bólim basshysy Nurlybek Úsenov.
