Jańadan qurylǵan Saýran aýdanyna qatysty barlyq is-sharalardyń júzege asýymen arnaiy komissiia ainalysady. Bul týraly Aptalyq apparat otyrysynda oblys ákimi Ómirzaq Shókeev aitty, dep habarlaidy "Ult aqparat".
«Memleket Basshysynyń Jarlyǵyna sáikes, Túrkistan oblysynda jańa Saýran aýdany quryldy. Ákimshilik ortalyǵy - Shornaq aýyly bolady. Oǵan Shaǵa, Jańa Iqan, Eski Iqan, Úshqaiyq, Iassy, Oranǵai, Qarashyq, Júinek, Babaiqorǵan, Shornaq, Jibek joly, Maidantal aýyldyq okrýgteri kiretin bolady. Sondyqtan búgin tarihi kún. Biz osyǵan bailanysty tez arada barlyq sharalardy júzege asyrýymyz kerek»,-dedi oblys ákimi Ómirzaq Shókeev.
Jańa saýran aýdanynyń ákimshilik ortalyǵy – Shornaq aýyly bolady. Kentaý qalasynyń quramynan Shaǵa, Jańa Iqan, Eski Iqan, Úshqaiyq, Iassy, Oranǵai, Qarashyq, Júinek, Babaiqorǵan, Shornaq, Jibek joly, Maidantal aýyldyq okrýgteri shyǵarylyp, Saýran aýdanyna ótedi.
Ult rýhaniiatynda kieli uǵymǵa ainalǵan «Saýran» ataýynyń Túrkistan oblysynda qurylǵan jańa aýdanǵa berilýi negizdi. Ortaǵasyrlyq tarihi Saýran qalasy Uly Jibek jolynyń boiynda ornalasqan jáne ejelgi Túrkistan uǵymymen tyǵyz bailanysty. Saýran – XII ǵasyrda iri saýda ortalyǵy retinde irgetasy qalanǵan. XIII ǵasyrdyń orta shenide Saýran – Aq Ordanyń astanasy bolǵan. Shornaq aýyly oblys ortalyǵy Túrkistan qalasynan soltústik – batysqa qarai 20 shaqyrym jere ornalasqan. Búginde munda 12 myń halyq turady. Jańadan qurylatyn aýdan halqynyń sany 100 myńnan asatyn bolady. Kentaý qalasynda ornalasqan 12 aýyldyq okrýgterinen jańa aýdan, Shornaq aýylyn ákimshilik ortalyǵymen jalpy kólemi 650 myń gektar jerde ornalasqan.
Eske salaiyq, biylǵy 19 aqpanda halyq aldynda esep bergen Túrkistan oblysynyń ákimi Ómirzaq Shókeev óńirde jańa – Saýran aýdanyn qurý týraly QR Prezidenti Qasym-Jomart Toqaevqa usynys berilgenin málim etken edi.
Bul usynysty óńir basshysy aldymen, ótken jyldyń sońynda Kentaý qalasy men onyń aýyldyq okrýgteriniń turǵyndaryna usynǵan bolatyn. Jergilikti halyq Saýran aýdanyn qurý týraly Ó.Shókeevtiń bastamasyn qýanyshpen qoldady.
Kentaý qalasy Túrkistan qalasymen qatar birdei damytylatyny josparlanǵan.
Sondai-aq biylǵy 14 naýryzda QR Mádeniet jáne sport ministrligi Mádeniet jáne óner isteri departamentiniń direktory Kúmis Seiitovanyń tóraǵalyǵymen ǵylymi-ádistemelik keńestiń kezekti otyrysy ótti. Onda kóne Saýran qalashyǵyn damytý máselesi talqylandy.
