Memleket basshysy Básekelestikti qorǵaý jáne damytý agenttiginiń Tóraǵasy Serik Jumanǵarindi qabyldady, dep habarlaidy Aqorda.
Serik Jumanǵarin Prezident Qasym-Jomart Toqaevty jańadan qurylǵan Básekelestikti qorǵaý jáne damytý agenttiginiń aldaǵy jumys josparymen tanystyrdy.
Prezidentke elimizdegi básekelestikti damytý, oǵan qolaily jaǵdai jasaý jáne ulttyq ideia retinde qabyldaý maqsatynda atqarylatyn is-sharalar týraly baiandaldy. Osy maqsatta barlyq salalar men aimaqtardy qamtityn básekelestikti damytý jóninde Ulttyq joba ázirlenedi. Salalyq jáne aimaqtyq básekelestik talaptary jasalady.
Agenttik tóraǵasy Memleket basshysyna jańa qurylymnyń qyzmetin uiymdastyrý jospary týraly aitty. Ásirese, tutynýshylardyń talabyn qanaǵattandyrý, ekonomikanyń turaqty ósimi men damýyn qamtamasyz etý, naryq sýbektileriniń ekonomikalyq tiimdiligi men básekege qabilettiligin arttyrýǵa basymdyq berilmek.
Prezident halyqaralyq naryqtaǵy ozyq tájiribelerdi basshylyqqa ala otyryp, Qazaqstanda durys básekelestik qalyptastyrý mańyzdy ekenin atap ótti.
Kezdesý sońynda Qasym-Jomart Toqaev Agenttik basshysyna Qazaqstan halqyna arnaǵan Joldaýyndaǵy básekelestikti qorǵaý jáne ekonomikanyń tiimdiligin arttyrýǵa baǵyttalǵan tapsyrmalardy oryndaýdyń mańyzdylyǵyna toqtaldy. Joldaý júktegen mindetterdi oryndaý boiynsha birqatar naqty tapsyrma berdi.
