Jańa Zelandiiada koronavirýspen aýyryp jatqandar qalmady. Bir kún buryn COVID-19 juqtyrǵan sońǵy naýqastyń jazylǵany habarlandy. Eki aptada koronavirýsty juqtyrý tirkelmegen.
8 maýsymnan Jańa Zelandiia epidemiiaǵa bailanysty barlyq shekteýdi alyp tastady. Tek shekara ǵana jabyq kúii qala beredi.
Elde karantin 25 naýryzda engizilip, sáýirdiń sońynan shekteýler birtindep alyna bastady.
Bes million turǵyny bar Jańa Zelandiiada koronavirýsty 1504 adam juqtyrǵan. Onyń 22-si qaitys bolǵan. Qalǵany jazylǵan.
Jańa Zelaniia koronavirýstan qutylǵan eń iri elge ainaldy. Eýropada epidemiiadan Chernogoriia arylǵan. Infektsiia juqtyrǵandar Islandiiada, Sloveniiada jáne Horvatiiada nólge jaqyndap keledi.
Álemde virýs juqtyrǵandar artyp keledi. Kúnine kemi 100 myń adam qosylady. Onyń kóbi AQSh pen Latyn Amerika elderine keledi. Koronavirýstyń taralýy boiynsha senimdi aqparat kózine ainalǵan Djons Hopkins ýniversitetiniń málimetinshe, virýsty juqtyrǵandar 7 millionnan asyp, 3,5 million adam jazylǵan, 400 myń adam qaitys bolǵan.
