Beibit jinalystar týraly zań jobasyn talqylaý kezinde qoǵam tarapynan eleýli qyzýǵyshylyq boldy. Bul pikirdi «Team Qazaqstan» Respýblikalyq jastar qoǵamdyq birlestiginiń tóraǵasy, telejýrnalist Ashat Sadyrbai aitty, dep habarlaidy QazAqparat.
«Jańa zań jobasy qoǵamda qyzý talqylaýda boldy. Bul jaqsy úrdis, sebebi talqylaý bolsa, qyzyǵýshylyq ta artady. Osy oraida qujat jobasy qalyń kópshiliktiń nazaryn aýdardy. Zań jobasyna qatysty jiyndarǵa birneshe ret qatystym, sol kezde eleýli usynystardy, pikirtalastardy baiqadyq», - dedi A. Sadyrbai Parlament Májilisinde tilshilerge bergen suhbatynda.
Sonymen qatar, A. Sadyrbai mitingilerde BAQ ókilderiniń qaýipsizdigi mańyzdy ekenin atap ótti.
«Zań jobasynda jýrnalisterdiń mitingige qatysty quqyqtary men mindetteri kórsetilgen. Barlyǵymyz bilemiz, buqaralyq aqparat quraldary týraly zań bar ári onda jýrnalisterdiń quqyǵy men mindeti jazylǵan. Beibit jinalystar týraly zań jobasynda jýrnalisterdiń quqyǵy men mindetteri qajet pe?! Meniń oiymsha, bul bap qajet, sebebi dástúrli BAQ basqa kórinis aldy. Atap aitqanda, ǵalamtor, áleýmettik jeliler qaryshtap damyp ketti. Qazir maqala jariialaý úshin qaltadaǵy smartfonnyń ózi jetkilikti nemese áleýmettik jeli arqyly tikelei efirge shyǵý múmkindikteri paida boldy. Osy tusta jýrnalisterge qatysty zańnama ózgertýler men tolyqtyrýlar qajet dep oilaimyn», - dedi jastar qoǵamdyq birlestiginiń tóraǵasy.
Aita keteiik, búgin Májiliste «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasy tanystyryldy.
QR Aqparat jáne qoǵamdyq damý ministri Dáýren Abaevtyń sózine qaraǵanda, qujat jobasynda beibit jinalystardy uiymdastyrýshylardyń, oǵan qatysýshylardyń quqyqtary men mindetteri naqty aiqyndalady.
«Uiymdastyrýshylardyń, qatysýshylardyń quqyqtary men mindetteri naqty aiqyndalatyn bolady. BAQ salasyndaǵy ókiletti organ beibit jinalystarǵa qatysatyn jýrnalist qyzmetiniń erejesin, jýrnalistik aiyrmashylyq belgisi pishinin qabyldaityn bolady. Uiymdastyrýshylar úshin beibit jinalystardy ótkizýdiń yńǵaily bolýy maqsatynda uiymdastyrýshylardyń aiyrmashylyq belgileriniń pishini qabyldanady», - dedi Dáýren Abaev.
