QR Bas Prokýrorynyń orynbasary Marat Ahmetjanov esirtki qylmysy úshin jaýapkershilikti kúsheitý sharalaryn túsindirdi, dep habarlaidy QazAqparat.
Memleket basshysy qol qoiǵan Qylmystyq, qylmystyq-protsestik zańnamany jetildirý boiynsha QR Zańy arqyly esirtkini nasihattap, zańsyz jarnamalaǵany úshin (Qylmystyq kodekstiń 299-1-baptary) 6 jylǵa deiin bas bostandyǵynan aiyrý jazasy engizildi.
«Esirtki zatyn satýdyń jańa tásilderin taýyp, úiler men jataqhanalardyń qabyrǵasyna ashyqtan-ashyq habarlama ilip ketetin narkodilerlerdiń áreketi qoǵamdy alańdatyp otyr. Endi bul áreket zańmen jazalanady jáne aýyr qylmys bolyp sanalady», - dedi Marat Ahmetjanov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, zańsyz ainalym úshin jaýapkershilikti kózdeitin baptarda (QK 297-b.) jáne esirtki paidalanýǵa kóndirgeni úshin (QK 299-b.) «Elektrondyq aqparattyq resýrstardy paidalaný» jáne «Qoǵamdyq oryndarda» degen jańa saralaý belgileri engizildi.
«Budan bylai internet arqyly, túngi klýbta, dámhanada, parktegi esirtki ainalymy úshin 15 jylǵa deiin bas bostandyǵynan aiyrýǵa, al kámeletke tolmaǵan adamǵa osyndai tásilmen esirtki satqandar ómir boiyna bas bostandyǵynan aiyrylady», - dedi M. Ahmetjanov.
