Májilis tóraǵasy Nurlan Nyǵmatýlin palata otyrysynda "Qazaqstan Respýblikasynyń biologiialyq qaýipsizdigi týraly" zań jobasynyń mańyzy men ózektiligi týraly aitty, - dep habarlaidy Tengrinews.kz.
Zań jobasy birinshi oqylymda maquldandy.
"Zań jobasy Memleket basshysy Qasym-Jomart Kemeluly Toqaevtyń tapsyrmasymen ázirlengen. Ol elimizde bioqaýipsizdikti qamtamasyz etýge arnalǵan. Bul zańnyń qabyldanýy búkil álemdegi epidemiologiialyq jaǵdaiǵa bailanysty, ásirese, koronavirýs pandemiiasy kezindegi shuǵyl qajettilikten týyndady. Bul jaǵdai qaýipti biofaktorlardyń saldaryn joiý úshin jedel áreket etý sharalaryn qabyldaýǵa daiyn bolý mańyzdy ekenin kórsetti", - dedi Nurlan Nyǵmatýlin.
Zań jobasy biologiialyq qaýipsizdik salasyndaǵy memlekettik saiasatty iske asyrýdyń biryńǵai júiesin qalyptastyrýǵa, memlekettik organdardyń ókilettikterin naqty ajyratýǵa jáne olardyń qyzmetin úilestirýge múmkindik beredi. Sonymen qatar, jalpy talaptardy birizdendirý jáne patogendi biologiialyq agentterdiń ainalymy boiynsha biryńǵai standarttardy engizý, sondai-aq, eldiń bioqaýipsizdik salasynda monitoring, boljaý jáne modeldeý júrgizý qajet.
"Bul zań jobasy Qazaqstanda biologiialyq qaýipsizdikti qamtamasyz etýdiń jańa modelin qurý úshin quqyqtyq negiz bolady ári azamattar men qorshaǵan ortany qorǵaýǵa baǵyttalady", - dedi Májilis spikeri.
Depýtattar osy zań jobasyn talqylaý barysynda biologiialyq qaýipsizdik salasyndaǵy biryńǵai memlekettik aqparattyq júie derekteri máselelerine, memlekettik aqparattyq júielerdi zańdy tulǵalardyń, onyń ishinde jeke tulǵalardyń aqparattyq júielerimen integratsiialaý kezinde týyndaýy múmkin mańyzdy aqparattyń jariia etilýi nemese joǵalyp ketýine qatysty máselelerge erekshe nazar aýdardy.
Nurlan Nyǵmatýlin aqparattyq júielerdi biriktirgennen keiin derekter qoryna qol jetkize alatyn uiymdar qoljetimdiligi shekteýli júieni engizýi tiis ekenin aitty. Sonymen qatar, ol densaýlyq saqtaý ministrine biologiialyq qaýipsizdik salasyndaǵy biryńǵai memlekettik aqparattyq júieni qurý barysyn jeke baqylaýǵa alý qajet ekeni týraly málimdedi.
