Elordalyq dárigerler balaǵa aýyr dárejedegi gipoksiia-ishemiialyq entsefalopatiia diagnozyn qoidy. Em náresteniń jaǵdaiyn turaqtandyrýǵa kómektesken. Ata-anasynyń aitýynsha, bala tipti saýyǵyp kele jatqan.
"Jaǵdaidyń aýyrlyǵyna qaramastan, bizge kúnine eki ret balamen qaýyshýǵa ruqsat etildi. Áielime qolyna alýǵa ruqsat etildi. Biz bir aiǵa jýyq sonda boldyq, jaǵdaiy jaqsarǵanyn baiqadyq. Balam qolyn kóterip, saýsaqtaryn qysa bastady. Ońaltý aiaqtalǵan soń qaitadan Pavlodarǵa jiberdi. Aldymen perinataldy ortalyqqa, sonda 2-3 kún jatty, keiin ulyńyz jańa týǵan náreste jasynan shyqty dep, ony balalar aýrýhanasyna aýystyrdy", - deidi balanyń ákesi Vasilii Alavatskii.
Er adamnyń aitýynsha, ol ulyn sońǵy ret 20 shildede, konsiliým ótken kúni kórgen, onda dárigerler náresteniń emi týraly aitýy kerek bolǵan.
"Biraq nevrologiia bólimshesiniń meńgerýshisi bala óledi dep, ony emdemeitinderin ashyq aitty. Ol ony emdeýdiń máni joǵyn aitty. Dál diagnoz qoiý úshin qosymsha analiz alýyn suradyq. Biraq analiz aqyly, 40 myń teńge turady, daiyndalýǵa 90 kún ketedi, balańyz shydamaidy degen jaýap estidik. Biraz kúnnen soń reanimatsiiadan keiin palliativ tósekke jatqyzyp, onyń jaǵdaiyn ólgenshe ǵana baqylaimyz dedi. Analiz úshin aqsha tóleýge daiynbyz, biraq dárigerler ulymyzdy nege tiridei kómip jatyr? Ony kórýge nege ruqsat etilmeidi? Konsiliýmde ulymyzǵa traheostomiia jasaityndaryn aitty. Bir aptaǵa jýyq ýaqyt ótti, balaǵa ne bolǵanyn bilmeimiz", - deidi balanyń anasy kózine jas alyp.
Áiel júktilik kezinde Pavlodar qalasynyń №4 emhanasynda baqylaýda bolǵan. Mioma men qant diabetine qaramastan, dárigerler aitýynsha, júktilik jaqsy ótken, náreste patologiiasyz damyǵan. Biraq júktiliktiń 33-shi aptasynda apparat sýdyń kóptigin anyqtap, áiel shuǵyl túrde aýrýhanaǵa jatqyzylǵan. Jaǵdaiy nasharlaǵan soń kesar tiligi jasalǵan.
"Dárigerlerdiń salǵyrttyǵynan ulymyz qazir jansaqtaý bóliminde jatyr. Bireýler júktilik kezinde durys teksermegen, endi bireýler ony ómir súrýge qaýqary joq dep sheshken. Dárigerler qutqaryp, emdemei me, ásirese sábidi, biraq ulymyzǵa nemquraidylyq tanytyp, oǵan múlde kómek kórsetkisi kelmeitindei", - dedi sábidiń ákesi.
Pavlodar oblysynyń Densaýlyq saqtaý basqarmasy ókilderi sábidi emdep jatqanyn aitty.
"Bala oblystyq balalar aýrýhanasynda tolyq em qabyldap jatyr. Ata-anasyna balanyń jaǵdaiy men aýrýdyń boljamy týraly aqparat berildi. Konsiliým kúni ata-anasyna balaǵa barýǵa múmkindik berildi. Epidemiologiialyq qaýipsizdikti qamtamasyz etý maqsatynda jáne jansaqtaý bólimshesiniń erejelerin eskere otyryp, jii qaýyshý múmkin emes", - dep túsindirdi oblystyń DSB ókilderi.
Sondai-aq, vedomstvo sábidiń aýyr haline bailanysty ata-ananyń talaby boiynsha massaj jáne jattyǵý terapiiasy túrindegi ońaltý emi kórsetilmeitinin aitty.
"25 shildede Nur-Sultan UMC KQ mamandarynyń qatysýymen telemeditsina júrgizýge ótinish berildi. Konsýltatsiia nátijesi týraly balanyń ata-anasyna habarlanady", - dedi vedomstvo ókilderi.
Sábidiń ata-anasy Densaýlyq saqtaý basqarmasyna, Pavlodar oblysy meditsinalyq jáne farmatsevtikalyq baqylaý komitetine aryz jazyp, tipti oblys ákimi orynbasaryna de barǵan. Kelesi kúni olarǵa ulymen kezdesýge ruqsat berilgen.
"Onyń jaǵdaiy nasharlap ketti, komada jatyr, basynda perinataldyq ortalyqtan qalǵan tósek izderi bar. Dárigerlerdiń ózi oń dinamikamen túskenin, qazir jaǵdaiy nasharlap ketkenin aitady. Naqty diagnoz ázirge belgisiz. Ulymyzǵa Nur-Sultanda naqty diagnoz qoiyp, emdeýdi bastaýyn suraimyz. Kesh bolyp kete ma dep qorqamyz, kómek qolyn suraimyz", - dedi balanyń ákesi.
