Jańa týǵan sábi de koronavirýspen aýrýy múmkin. Bul týraly QR Densaýlyq saqtaý ministrliginiń bas pediatry, meditsina ǵylymdarynyń doktory Riza Boranbaeva aitty, dep habarlaidy QazAqparat.
«Eresekterge qaraǵanda balalar koronavirýs infektsiiasymen sirek aýyrady. Jalpy, balalarda aýrý simptomsyz nemese jeńil formada ótedi. Degenmen Covid-19-dyń balalar arasynda aýyr ótetin jaǵdailaryn da joqqa shyǵarýǵa bolmaidy. Tipti, jańa týǵan sábi de aýyryp qalýy múmkin. 2021 jyldyń 1 qańtarynan beri Covid-19-dyń naqtylanǵan diagnozymen 16 245 bala, onyń ishinde 34 jańa týǵan sábi tirkeldi. 13 985 patsient emdelip shyqty. Bul shamamen 80 paiyzdy quraidy», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, koronavirýspen aýyrǵan balalardyń 90 paiyzynda infektsiia simptomsyz formada ótken. Balalardyń 10 paiyzy ortasha aýyr jáne 0,1 paiyzy aýyr formada aýyrǵan.
«Aýyrǵandardyń arasynda tek 58 balaǵa virýstyq ókpe qabynýy diagnozy qoiyldy. Virýstyq ókpe qabynýy balalar arasynda ádette óte sirek kezdesedi. Elimizde balalarǵa vaktsina salynbaidy. Onyń ústine koronavirýsty emdeitin resmi dárilik zat ta joq. Sondyqtan olardyń qorǵaýdyń mańyzy quraly - epidemiiaǵa qarsy is-sharalardy saqtaý. Virýsty aýa-tamshy jolymen taralady. Osyǵan bailanysty balaǵa jótelgende nemese túshkirgende aýyzdy oramalmen jabýdy, qoldy únemi jýýdy, aýyzdy, muryndy jáne kózdi ustamaýdy úiretý kerek»,- dedi Riza Boranbaeva.
