27 shildede Qazaqstanda 6925 adamnyń analizinen koronavirýs anyqtaldy. Bul - indet bastalǵaly beri tirkelgen eń joǵary kórsetkish. Odan bólek, bir kúnde 324 adam koronavirýs pnevmoniiasyna shaldyqqan. Densaýlyq saqtaý ministrligi koronavirýs pnevmoniiasy men adam ólimi kórsetkishi boiynsha eki kún burynǵy málimetti jariialap júr.
26 shildede 92 adam qaitys bolǵan: 81 adam – koronavirýstan, 11 naýqas koronavirýs pnevmoniiasynan kóz jumǵan.
Qazir virýstyń taraýy boiynsha "sary aimaqta" Túrkistan oblysy ǵana qalǵan. Qalǵan oblystar men qalalar – "qyzyl aimaqta" tur.
Virýs ásirese, Nur-Sultan men Almaty qalalarynda, Qaraǵandy oblysynda kúsheigen. Seisenbi kúni Nur-Sultanda - 1531, Almatyda - 1250, Qaraǵandy oblysynda 920 naýqas tirkeldi. Qalǵan aimaqtarda bir kúnde anyqtalǵan naýqastar 500-ge jetpeidi.
Bilik indettiń órshýin delta varianttyń taraýymen bailanystyrady. "Delta" koronavirýstyń kádimgi túrine qaraǵanda jyldam juǵady jáne asqynýy da tez. Resmi málimet boiynsha, Qazaqstanda delta maýsym aiynda tirkelgen.
28 shildedegi málimet boiynsha 89 058 adam koronavirýs infektsiiasynan (86 911 KVI+ jáne 2 147 KVI-) emdelip jatyr.
Olardyń ishinde:
24 748 patsient statsionarda,
64 310 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
1 500 adamnyń jaǵdaiy aýyr,
319 patsienttiń jaǵdaiy óte aýyr,
160 naýqas ÓJJ apparatynda jatyr.
Indet bastalǵaly beri 549 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 60 myńnan astam adam shaldyqqan.
2020 jyldyń naýryz aiynan beri 5619 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3660 adamnyń ólimine sebep bolǵan.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,2 millionnan asa adam vaktsinanyń birinshi dozasyn alǵan. Ekpeniń tolyq dozasyn alǵandar 3,4 millionnan asty.
