Qazaqstannyń jańa Prezidenti Qasym-Jomart Toqaev bar kúshin halyq igiligine jumsaitynyn aityp, elimizdiń endigi saiasaty qandai bolatynyn málim etti, dep habarlaidy Sputnik Qazaqstan tilshisi.
Onyń aitýynsha, ol bar tájiribesin Elbasynyń syndarly saiasatyn jalǵastyrýǵa jumsamaq.
"Aldaǵy missiianyń bar jaýapkershiligin sezine otyryp, bar tájiribemdi Memleket basshysynyń strategiialyq baǵytyn jalǵastyrýdy josparlap otyrmyn. Barshamyzǵa ortaq maqsat – Elbasynyń basty saiasi tarihi murasy, memleketimizdiń Táýelsizdigin saqtaý jáne nyǵaitý", - dedi Toqaev.
Sonymen qatar jańa Prezident Nursultan Nazarbaevtyń óz erkimen ókilettigin toqtatýyna qatysty pikirin bildirdi.
"Prezident retinde óz erkimen ókilettigin toqtatý arqyly Nursultan Nazarbaev barsha álemge danyshpan, uly saiasatker ári demokratiialyq qundylyqtarǵa shynaiy berilgen adam ekenin kórsetti. Ol boiyndaǵy osyndai qasietterimen otandyq jáne álem tarihynda izin qaldyrdy", - dedi ol.
Sondai-aq Qasym-Jomart Toqaev halyqtyń kúshi birlikte ekenin, al ózi qazaqstandyqtarǵa adal qyzmet etýge sóz beretinin atap ótti.
"Memlekettiń bolashaǵy úshin mańyzdy sátte barlyǵy Qazaqstandy demokratiialyq jáne órkendegen memleketke ainaldyrý ideiasynda toptasýy kerek. Aldymyzda otanymyzdyń bolashaǵy úshin atqaratyn aýqymdy jáne kúrdeli jumys tur. Bar kúsh jigerimdi, el igiligine jumsaýdy, halqymyzǵa adal qyzmet etýdi ózime mindet dep esepteimin", - dep túiindedi sózin Qazaqstannyń jańa Prezidenti.
Qasym-Jomart Toqaev memleket úshin mańyzdy sheshimdi qabyldar aldynda Nursultan Nazarbaevtyń bedeldi pikirin eskeretinin de málim etti.
Qasym-Jomart Toqaevtyń aitýynsha, burynǵy prezident Nursultan Nazarbaev QR Qaýipsizdik keńesiniń, ári Nur Otan partiiasynyń, Qazaqstan halqy assambleiasynyń tóraǵasy jáne QR Konstitýtsiialyq keńesiniń múshesi bolyp qala beredi.
"Ásirese, strategiialyq mańyzdy sipattaǵy sheshimderdi ázirlep, qabyldaǵan kezde Elbasynyń bedeldi pikirine erekshe basymdyq beriledi. Osylaisha, biz tynysh jáne qaqtyǵyssyz jaǵdaida bilikti ótkizip jatyrmyz. Bul memlekettiń ishki tutaqtylyǵyn saqtaýǵa, ári Qazaqstannyń álem aldyndaǵy bedelin nyǵaitýǵa tyń serpin beredi", - dedi jańa prezident.
Sonymen qatar Toqaev Elbasynyń ókilettigin toqtaýy bilikke keletin jas urpaq úshin jaqsy úlgi ekenin atap ótti.
