Qazirgi kezde tórtinshi munai óńdeýi zaýytynyń texnikalyq-ekonomikalyq negizdemesi ázirlenip jatyr, dep xabarlaidy QazAqparat tilshisi.
"Búginde Memleket basshysynyń tapsyrmasy boiynsha aldyn ala texnikalyq-ekonomikalyq negizdemeni ázirleitin jumys toby quryldy. Atalǵan top ekinshi jartyjyldyqta jańa zaýyttyń ornalasatyn jerin, negizgi parametrleri men qarjylandyrý tetikterin jariialaidy. QazMunaiGaz tiisti jumysty bastap ketti. Kúzdiń basynda biz tórtinshi munai zaýytynyń qai jerde ornalasatynyn jáne onyń naqty qansha ónim shyǵara alatynyn aitatyn bolamyz", - dedi QR Energetika ministri Qanat Bozymbaev búgin qoǵamdyq keńestiń otyrysynda.
Aita keteiik, búgingi keńeste Q.Bozymbaev munai óndirý kólemine qatysty boljam jasady. Onyń aitýynsha, Qazaqstanda munai óndirý kólemi 104 mln tonnaǵa jetetin bolady. Jaqyn arada Qazaqstan ishki naryqty otandyq janar-jaǵarmaimen tolyǵymen qamtamasyz ete alady.
"Biyl Shymkent munai óńdeý zaýytyn jańartý jumystary aiaqtalady. Osylaisha, munai óńdeýdiń jalpy kólemi 16 tonnaǵa jetetin bolady. Sosyn munai óńdeý zaýyttaryn jyl saiyn jóndeý ýaqyty 45 kúnnen 20 kúnge deiin qysqartý týraly sheshim qabyldandy. Endi, 45 kúndik jóndeý jumystary úsh jylda bir ret qana jasalady. Qalǵan ýaqytta 20 kúndik jóndeý júrgiziledi. Bunyń barlyǵy jóndeý jumystaryn basqarýdyń avtomatty júiesi aiasynda atqarylady. Atalǵan júieni biz aǵymdaǵy jylda engizetin bolamyz. Al jóndeý merzimi qysqarǵannan keiin munai óńdeý kólemi artady. Sóitip, árbir zaýytta daiyn munai ónimderi shamamen 30 myń tonnaǵa kóbeiedi.
Aldaǵy ýaqytta biz ishki naryqty tolyǵymen otandyq janar-jaǵarmaimen qamtamasyz ete alamyz", - dep atap kórsetti Q. Bozymbaev.
