Sársenbi kúni 11-shi býynnyń iPhone-yn tanystyrǵannan keiin Apple-diń naryqtaǵy quny 1 trillion dollardan asty, dep habarlaidy cnbc.com.
Sársenbi kúni birja saýdalary jabylardyń aldynda Apple aktsiialarynyń quny 2% ósip, 223,59 dollarǵa jetti.
Apple bul mejege byltyr tamyz aiynda da jetken bolatyn. Biraq Qytaida Apple ónimderi oidaǵydai satylmaýyna bailanysty, jeltoqsan-qańtar ailarynda aktsiialarynyń quny azaiǵan ári Apple milliondaǵan aktsiiasyn ózi satyp alǵan.
Aita keteiik, Apple naryqtaǵy quny 1 trillion dollardan asatyn álemdegi jalǵyz tehnologiialyq kompaniia emes. Microsoft korporatsiiasynyń da naryqtaǵy quny 1,04 trillion dollarǵa baǵalanady.
Seisenbi kúni Apple iPhone, Apple Watch jáne iPad-tyń jańa modelderi tanystyryldy, sondai-aq iPhone 11-diń baǵasy bastapqy qun retinde 50 dollarǵa azaityldy.
