Jan-jaqty saiasi reformalar jalǵasady. «Egemen Qazaqstan» gazetine bergen suhbatynda QR Prezidenti Qasym-Jomart Toqaev osylai dedi, dep habarlaidy "Ult aqparat".
«Qazaqta «El qýatty bolmai, baq turaqty bolmaidy» degen naqyl sóz bar. Osy oraida memlekettilikti nyǵaityp, halqymyzdyń ál-aýqatyn arttyrý úshin mańyzdy bastamalar qolǵa alyndy.
Eń aldymen, qoǵamnyń bereke-birligi bekem bolýy kerek. Buǵan bilik pen halyq arasynda turaqty dialog ornatý arqyly qol jetkizýge bolady. Osyǵan orai Ulttyq qoǵamdyq senim keńesi quryldy. Onyń negizgi maqsaty – qoǵamdyq sanany jańǵyrtýǵa arnalǵan aýqymdy sharalar uiymdastyrý, ózekti máselelerdi talqylap, tiimdi usynystar ázirleý. Búginge deiin keńestiń eki otyrysy ótkizildi. Saiasi, ekonomikalyq jáne áleýmettik jańǵyrý baǵyttary boiynsha kóptegen usynys jasaldy. Qoǵamdy alańdatqan túrli máseleler qyzý talqyǵa tústi», - dedi Q.Toqaev.
Memleket basshysy atap ótkendei, elimizde zaman talabyna sai saiasi reformalar júrgizilýde.
«Qazir meniń bastamammen Parlamentte birqatar mańyzdy zańnamalyq ózgerister talqylanýda. «Beibit jiyndardy uiymdastyrý jáne ótkizý tártibi» týraly zań jobasy qarastyrylyp jatyr. Bul elimizdiń demokratiialyq damýyn aiqyndaityn óte mańyzdy qujat bolatynyna kúmán joq.
Májilis pen máslihat depýtattarynyń sailaýyna túsetin saiasi partiialar áielder men jastar úshin otyz paiyzdyq kvota bóletin bolady. Osyǵan orai zańǵa tiisti tolyqtyrýlar engizý qarastyrylýda. Sondai-aq saiasi partiialardy tirkeýdi jeńildetý, parlamenttik oppozitsiia institýtyn qalyptastyrý úshin zańnamaǵa mańyzdy túzetýler jasalmaq.
Osy ózgerister saiasi úderisterdi odan ári liberalizatsiialaý jolyndaǵy naqty qadam bolady dep senemin. Jan-jaqty saiasi reformalar jalǵasady. Bul – bizdiń strategiialyq tańdaýymyz», - dedi Prezident.
Sondai-aq Qasym-Jomart Toqaev aazamattardyń ótinish-tilekterin jedel qarastyrý úshin iske asyrylyp jatqan «Halyq únine qulaq asatyn memleket» tujyrymdamasy týraly aitty.
«Bul – óte mańyzdy ári qajet bastama. Sheneýnikterdiń mindeti – eń aldymen, halyqqa qyzmet etý. Olar el-jurttyń muń-muqtajyna qulaq aspaǵanda kimge qulaq asady?! Osy qaǵidatty barlyq deńgeidegi memlekettik qyzmetshilerdiń sanasyna sińirgen jón. Qazirdiń ózinde bul baǵytta oń ózgeris bar.
Otandyq biznesti damytýǵa arnalǵan birqatar bastama júzege asty. Meniń tapsyrmam boiynsha shaǵyn jáne mikro biznes ókilderi úsh jylǵa tabys salyǵynan bosatyldy. Olardyń qyzmeti aldaǵy úsh jyl boiy tekserilmeidi. Sol úshin moratorii jariialanǵanyn bilesizder. Qazirgi tótenshe jaǵdai kezinde de kásipkerlerge úlken qoldaý kórsetilýde», - dedi Memleket basshysy.
Prezidenttiń aitýynsha, eldi alańdatatyn ózekti máseleniń biri – baspana.
«Osy baǵytta da aýqymdy jumystar atqaryldy. Úkimet aldyna Elbasy usynǵan «Baqytty otbasy» baǵdarlamasynyń aiasyn keńeitip, turǵyn úi qurylysyn jandandyrý mindeti qoiyldy. Soǵan sáikes, biyldan bastap jyl saiyn kóp balaly jáne múgedek balalary bar 10 myń otbasy turǵyn úimen qamtamasyz etiledi.
Az qamtylǵan jáne kóp balaly otbasylarǵa arnalǵan áleýmettik kómektiń jańa túrleri engizildi. Mysaly, kóp balaly otbasylarǵa tabysyna qaramai járdemaqy berile bastady. Jarty millionnan astam azamattyń 300 myń teńgege deiingi kepilsiz nesiesi óteldi. Bul bastamalar halyqtyń turmys sapasyn jaqsartýǵa baǵyttalǵan.
Byltyr «Pedagog mártebesi týraly» zań qabyldandy. Soǵan orai aldaǵy tórt jylda ustazdardyń eńbekaqysyn eki ese arttyrýdy tapsyrdym. Bul jumys júieli túrde júzege asyrylyp keledi. Biýdjet salasyndaǵy basqa da qyzmetkerlerdiń jalaqysy kóbeitilýde», - dedi Q.Toqaev.
Sonymen qatar QR Prezidenti jastardy qoldaýǵa baǵyttalǵan sharalar týraly aitty.
«Men talantty da talapty jastarǵa senim artamyn. Sol sebepti «Prezidenttik jastar kadrlyq rezervin» quryp, «júzden júirik, myńnan tulpar» shyqqan 300 jasty iriktep aldyq. Olardyń birazy qyzmetke ornalasty. Tiisti memlekettik organdarǵa jastar saiasatyna arnalǵan jańa keshendi baǵdarlama ázirleýdi tapsyrdym.
Osy jyldy «Volonter jyly» dep jariialadym. Búginde bul bastamanyń der kezinde kóterilgenin kórip otyrmyz. Qazirgidei tótenshe jaǵdaida volonterler aianbai eńbek etip júr. Kúrdeli kezeńde belsendilik tanytqan jigerli jastardy úlgi tutýymyz kerek.
Jalpy, bir jyl ishinde naqty jumystar atqaryldy. Sondyqtan eldiń eńsesin kóteretin mundai sheshimder aldaǵy ýaqytta da qabyldana beredi», - dep túidi Memleket basshysy.
