Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Jambyl Jabaevtyń 175 jyldyq mereitoiyn daiyndaý jáne ótkizý jónindegi memlekettik komissiianyń alǵashqy otyrysy ótti, dep habarlaidy Aqordanyń baspasóz qyzmeti.
Qazaqstan Prezidenti mereitoilyq is-sharalardyń joǵary uiymdastyrýshylyq jáne mazmundyq deńgeiin qamtamasyz etý úshin «Jambyl Jabaevtyń 175 jyldyq mereitoiyn daiyndaý jáne ótkizý jónindegi memlekettik komissiia qurý týraly» arnaiy Jarlyq qabyldaǵany belgili.
Otyrysty ashqan Memlekettik hatshy uly jyraý, dala Gomeri atanǵan Jambyl Jabaevtyń rýhani muralary álemdik mádeniettiń altyn qoryna engenin atap ótti. Jambyl Jabaev óziniń ǵibratty ǵumyrynda adami qasietterdi ardaqtaýdy, Otanǵa degen ińkárlikti jáne qara qyldy qaq jarǵan ádilettilikti jyryna arqaý etip ótti. Búgingi tańda onyń shyǵarmashylyǵy qoǵamnyń rýhani jańǵyrýy jolynda erekshe ózekti bolyp otyr.
Q.Kósherbaev byltyr uly Abaidyń 175 jyldyq jáne Ál-Farabidiń 1150 jyldyq mereitoilaryn joǵary deńgeide laiyqty atap ótilgenine toqtalyp, uly jyraýdyń mereitoiy da urpaqtyń sanasyna ulaǵat bolar taǵylymdyq jáne tanymdyq is-sharalar arqyly jalǵasatynyn aitty.
Otyrys barysynda Mádeniet jáne sport ministri Aqtoty Raiymqulovanyń, Almaty jáne Jambyl oblystarynyń ákimderi Amandyq Batalov pen Berdibek Saparbaevtyń, Qazaqstan Jazýshylar odaǵynyń basqarma tóraǵasy Ulyqbek Esdáýlettiń Jambyl Jabaevtyń 175 jyldyǵy aiasynda ótkizýge josparlanǵan is-sharalar týraly aqparattary tyńdaldy.
Talqylaý qorytyndysy boiynsha memlekettik komissiia mereitoilyq is-sharalardyń jalpyrespýblikalyq josparyn maquldady jáne bekitti. Mereitoilyq jyl ishinde respýblika boiynsha 500-ge jýyq áleýmettik, imidjdik, ǵylymi, tanymdyq is-sharalar ótkiziledi. Budan bólek, aqyn ómirinen derekti film túsirý, óleńderiniń jańa jinaqtaryn shyǵarý, aitystar men ádebi konkýrstardy, kitap kórmelerin uiymdastyrý, mereitoilyq moneta, poshta markasyn ázirleý jáne basqa da sharalar ótkizý kózdelip otyr.
Memlekettik hatshy Úkimetke jalpyrespýblikalyq jospardyń sapaly oryndalýyn jáne mereitoilyq is-sharalardyń aqparattyq turǵydan jan-jaqty súiemeldenýin qamtamasyz etýdi tapsyrdy. Oblystardyń, Nur-Sultan, Almaty, Shymkent qalalarynyń ákimderine Jambyl Jabaevtyń mereitoiyn merekeleý jónindegi óńirlik josparlardy ázirlep, bekitýdi jáne olardyń oryndalýyn qadaǵalaýdy mindettedi.
Talqylaý qorytyndysy boiynsha Memlekettik komissiia mereitoilyq is-sharalardyń jalpyrespýblikalyq josparyn bekitti.
