Jyl basynan beri Jambyl oblysynan 110 otbasy Pavlodar, Shyǵys Qazaqstan, Qostanai óńirlerine qonys aýdarǵan, dep habarlaidy QazAqparat.
Al, sońǵy eki jarym jylda elimizdiń soltústigi men shyǵys aimaqtaryna 400-ge jýyq jambyldyq otbasy qonys aýdarǵan. Bul «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» baǵdarlamasy aiasynda júzege asyrylýda eken.
«Qazir memlekettik jobaǵa qatysqysy keletinder qatary artyp otyr. Biyl Pavlodar óńirine 13 otbasy kóship bardy. Al Qostanai men Soltústik Qazaqstan oblystaryna 34 otbasydan jáne Shyǵys Qazaqstanǵa 74 adamnan turatyn 29 otbasy qonys tepti. Olardyń basym kópshiligi jer alyp, dihanshylyqpen ainalysqysy keletinder. Kóshetin azamatqa 35 ailyq eseptik kórsetkish esebinde kóshý sýbsidiiasy beriledi. Ol kóshetin otbasynyń árbir múshesine tólenedi. Barǵan jerinde ózi tańdap barǵan mamandyǵy boiynsha mindetti túrde turaqty jumysqa ornalastyrylady. Eń basty másele kóship barǵanda baspana usynylady. Ol baspanany jalǵa alý aqysyn da bir jylǵa deiin memleket tólep beredi», - deidi oblystyq jumyspen qamtýdy úilestirý jáne áleýmettik baǵdarlamalar basqarmasynyń bólim basshysy Ǵalijan Meiirmanov.
Mamandardyń aitýynsha oblystyń Qordai, Baizaq, Jambyl aýdandary men Taraz qalasynyń turǵyndary kóshýge jii niet bildiretin kórinedi. Biyl qabyldaýshy óńirlerge 352 adam kóshken. Onyń 102-si turaqty jumysqa ornalassa, taǵy 200-dei ótinish bildirgen azamattyń tizimderi jasaqtalyp, qujattary jinaqtalý ústinde eken.
