Qazaqstan Prezidenti Qasym-Jomart Toqaevtyń Jarlyǵymen Meiirjan Aimanovqa «Halyq qaharmany» ataǵy berildi, dep habarlaidy "Ult aqparat" Aqordaǵa silteme jasap.
«Qazaqstan Respýblikasyna sińirgen asa úzdik eńbegi, qyzmettik boryshyn atqarýda kórsetken erjúrektigi men janqiiarlyǵy úshin Jambyl oblysy tótenshe jaǵdailar departamenti órt sóndirý jáne avariialyq-qutqarý jumystary qyzmeti bastyǵynyń orynbasary Meiirjan Qaqpasynuly Aimanovqa «Halyq qaharmany» ataǵy berilip, airyqsha erekshelik belgisi – Altyn juldyz ben «Otan» ordeni tapsyrylsyn (marqum)», delingen qujatta.
Esterińizge sala keteiik, 26 tamyzda saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, joiqyn jarylys boldy. Sońǵy málimet boiynsha, Jambyl oblysyndaǵy jarylystan 13 qaza tapqan.
Keshe QR Prezidenti Qasym-Jomart Toqaev 29 tamyzdy Jalpyulttyq aza tutý kúni dep jariialaǵan bolatyn.
Azaly kúnniń jariialanýyna bailanysty kesheden beri Qazaqstan musylmandary dini basqarmasynyń uiǵarymymen eldegi meshitterde beibit kúnde sheiit bolǵan áskeriler men qutqarýshylardyń rýhyna baǵyshtap Quran hatym oqylyp jatyr.
Buǵan deiin qaza tapqan áskeri qyzmetshilerdiń aty-jóni jariialanǵan edi:
1. 1981 jyly týǵan serjant Marat Sailaýuly Meshinbai.
2. 1979 jyly 8 qazanda týǵan starshina Erkin Erikbaiuly Nádirbekov.
3. 1981 jyly 20 maýsymda týǵan efreitor Rýslan Júrsinbaiuly Janbolatov.
4. 1969 jyly týǵan áskerilendirilgen kúzet qyzmetshisi azamat Orazbek Daiyrbekuly Dálibaev.
5. Ońtústik óńirdiń áskeri prokýrory ádilet polkovnigi Arman Qapezov.
Qaitys bolǵandar arasynda azamattyq qorǵaý organdarynyń qyzmetkerleri de bar:
1. Jambyl oblysy TJD «ÓSjAQJQ» MM Taraz q. 3-ÓSB órt sóndirýshi-qutqarýshy Arnur Serikuly Temirbolatov.
2. Jambyl oblysy TJD «ÓSjAQJQ» MM Taraz q. 3 – ÓSB aǵa órt sóndirýshi-qutqarýshy Eldos Qadyrbaiuly Sandybaev.
3. Jambyl oblysy TJD «ÓSjAQJQ» MM Órt sóndirý kezekshi qyzmetiniń jedel kezekshisi, órt sóndirý basshysynyń orynbasary Aleksandr Nikolaevich Mikropýlo.
4. Jambyl oblysy TJD «ÓSjAQJQ» MM Taraz qalasy 1 – MÓSB aǵa órt sóndirýshi-qutqarýshy Táńibergen Kudaibergenuly Tórebekov.
5. Jambyl oblysy TJD «ÓSjAQJQ» MM bastyǵynyń orynbasary Meiirjan Qaqpasynuly Aimanov.
