Jambyl oblysynda salynyp jatqan vaktsina shyǵaratyn zaýyt iske qosýǵa daiyn. Bul týraly QR Premer-Ministrdiń orynbasary Eraly Toǵjanov málim etti, dep habarlaidy QazAqparat.
«Osy ýaqytqa deiin zaýytta jasalýy tiis barlyq josparly jumys ýaqytyly jasaldy. Iaǵni, montajdaý, jabdyqtardy iske qosý jáne validatsiia sharasy da tolyǵymen aiaqtaldy. Sol siiaqty búginde atalǵan zaýyt qyzmetkerleri de tolyqtai oqýdan ótti. Bir sózben aitqanda, búginde zaýyt óndiriske tolyq daiyn. Ótkenge kóz júgirtsek, otandyq vaktsina aldymen 50 myń dozamen óndirildi, sáýir-shilde ailarynda onyń kólemi 100 myńǵa jetti. Al tamyz aiynda Biologiialyq qaýipsizdik problemalarynyń ǵylymi-zertteý institýtynda (BQPǴZI) otandyq QazVac-tyń 650 myń dozasy óndirildi», - dedi E. Toǵjanov Úkimet úiinde ótken baspasóz máslihatynda.
Premer-Ministr orynbasarynyń málimdeýinshe, qyrkúiek aiynyń sońyna deiin otandyq vaktsinany óndirý kólemi 750 myń dozaǵa deiin jetýi múmkin.
«Bul bolashaq zaýyt jumysynyń qýattylyǵyn kórsetip otyr. Aldaǵy ýaqytta biz ishki suranysty tolyq qamtamasyz etýmen qatar, eksportqa da shyǵa alamyz», - deidi ol.
