Sýretter: azh.kz
Jambyl oblysyndaǵy áskeri bólimde qaitys bolǵan sarbazdyń ólimine kúdikti retinde ustalǵan Aibolat Amanjolovtyń otbasy ashtyq jariialady, - dep habarlaidy Tengrinews.kz agenttigi azh.kz portalyna silteme jasap.
Amanjolov tutqyndalǵannan keiin ata-anasy balasyn kóre almaǵan. Alty balasy bar ata-ana Atyraý oblystyq Qorǵanys isteri jónindegi departamenttiń aldyna jinalǵan. Olardyń aitýynsha, balasyn eshqandai eskertýsiz Qordai aýdandyq politsiiasynan Almatydaǵy tergeý izoliatoryna alyp ketken.
"Ulymdy Almatydaǵy tergeý izoliatoryna aýystyrdy, bul týraly eshkim bilmedi. Tipti advokat bilmeidi. Qazir ulymyzdyń tiri nemese óli ekenin bilmeimiz. Ony bireý qorqytýy múmkin. Oǵan zańdy ókildermen kezdesýge ruqsat etilmese, onda bir nárse durys emes degen sóz!" - deidi soldattyń anasy Ainur Tólemisova kózine jas alyp.
Ainur Tólemisovanyń aitýynsha, ulymen birge áskerge ketkender ant qabyldap, qyzmetke kirisken.
Soldattyń anasy buǵan deiin Aibolattyń bul oqiǵaǵa qatysy joq dep málimdeme bergender endi óz aiǵaqtaryn ózgertip jibere me dep qorqady.
"Ant qabyldaǵannan keiin balalarǵa basshylyq tarapynan qysym bolatynyna senimdimin. Ulym tergeý izoliatorynda, onyń qasyna buryn qylmys jasaǵan ári 10 jyl túrmede otyrǵan er adamdy otyrǵyzǵan. Ol meniń ulyma barlyq kináni óz moinyna alýǵa keńes bergen. Demek, ol da áskeri tergeýshilerdiń adamdary", - deidi sarbazdyń anasy.
Ashtyq jariialaǵan soldattyń ata-anasy, zeinetke shyqqan ájesi, aǵalary men ápkeleri Aibolatty Atyraýǵa ákelgenshe, Departament aldynda sońyna deiin otyrýǵa nietti.
"Qylmystyq is týraly aqparat joq. Ulym áli áskeri qyzmetker emes, sondyqtan ony Atyraýdaǵy tergeý izoliatoryna aýystyrýǵa bolady dep oilaimyn. Ashtyq jariialaýdy ony Atyraýǵa ákelgen kezde ǵana toqtatamyz", - deidi Ainur Tólemisova.
Atyraý oblysy Qorǵanys departamenti bastyǵynyń orynbasary Erjan Jumanovtyń aitýynsha, Aibolat Amanjolov barlyq meditsinalyq jáne psihologiialyq synaqtan sátti ótken.
"Onyń jeke isin suratty. Bizde bar qujattardy jiberdik. Ol meditsinalyq jáne psihologiialyq synaqtardan sátti ótti. Politsiia esebinde turmaǵan. Qazir tergeý júrip jatyr", - dedi Erjan Jumanov.
Aita keteiik, mańǵystaýlyq sarbaz áskerge shaqyrylǵanyna birneshe kún ótkende qaitys boldy. Oqiǵa Jambyl oblysy Qordaida bolǵan. 22 sáýirde Merzimdi qyzmettiń qatardaǵy jaýyngeri Álibek Qalbai Gvardeiskii kentindegi qalalyq tiptegi áskeri aýrýhanada qaitys boldy. Mańǵystaý oblysy Aqshuqyr aýylynyń turǵyny 18 jastaǵy Álibek Qalbaidyń týystarynyń sózinshe, ol 13 sáýirde shaqyrtý alyp, QR Qorǵanys ministrliginiń 30212 áskeri bólimine áskeri boryshyn óteýge barǵan. Bólimshe Jambyl oblysy Qordai aýylynda ornalasqan. Týystary bul oqiǵa ádil tergeletinine úmittenedi.
Eske salaiyq, buǵan deiin Jambyl oblysyndaǵy sarbazdyń ólimine kúdikti anyqtalǵany habarlanǵan bolatyn.
