Jambyl oblysynyń ákimi Berdibek Saparbaevtyń tóraǵalyǵymen ótken Jambyl oblysynyń jedel shtabynyń kezekti otyrysynda taiaý ýaqytta shekteý sharalaryn kúsheitý týraly sheshim qabyldandy. Shekteý sharalaryn kúsheitý týraly sheshim koronavirýspen aýyrǵan naýqastar sanynyń ósýine bailanysty bolyp otyr, – dep habarlaidy "Ult aqparat".
Basqosýda taýarlar men qyzmetterdiń sapasyn baqylaý departamentiniń basshysy Berik Jarqynbekov baiandama jasady.
«Ókinishke orai, statistika kóńil kónshitpeidi. Eger 15-21 maýsym aralyǵynda óńirde 317 jaǵdai anyqtalsa, 22-28 maýsym aralyǵynda ol – 473-ti quraǵan. Onyń 60 paiyzy Taraz qalasynda tirkelgen», - dedi Berik Jarqynbekov.
Sondai-aq, onyń aitýynsha, kórsetkishtiń nasharlaýyna karantindik sharalardy jeńildetý jáne epidemiiaǵa qarsy sharalar algoritmderiniń saqtalmaýy áser etken.
«Epidemiologiialyq toptardyń júktemesiniń aýyrlyǵyn eskere otyryp, turǵyndarǵa meditsina qyzmetkerleri men epidemiologtar jetkenge deiin barlyq saqtyq sharalaryn saqtaýdy usynamyz. Atap aitsaq, ózin-ózi oqshaýlaý, temperatýrany ólsheý, densaýlyq jaǵdaiyn baqylaý, qajet bolǵan jaǵdaida ýchaskelik dárigerdi shaqyrtý, jumysqa shyqpaý kerek», - dedi Berik Jarqynbekov.
Departament basshysy barlyq eńbek ujymdarynyń kire beristerinde qyzmetkerlerdiń dene temperatýrasyn ólsheýdi, aýrý belgileri bar qyzmetkerlerdi jumysqa jibermeýdi, sanitariialyq-epidemiologiialyq talaptardy saqtaýǵa jaýapty adamdy aiqyndaýdy, jumys kúni ishinde qolǵaptar men maskalardy paidalanýdy, bir bólmede keminde bir metr qashyqtyqty saqtaýdy, qyzmetkerlerdi jumysqa jáne jumystan úige qyzmettik avtokólikpen ortalyqtandyrylǵan jetkizýdi qamtamasyz etýdi usyndy.
Al, oblystyq densaýlyq saqtaý basqarmasynyń basshysy Marat Jumanqulov turǵyndar barlyq máseleler boiynsha táýlik boiy jumys jasaityn 1302, 103 bailanys ortalyqtaryna júgine alatyndyǵyn jetkizdi.
Sonymen qatar, arnaiy qurylǵan mobildi toptar simptomsyz naýqastardy, bailanysta bolǵan adamdardy, statsionardan keiin ambýlatoriialyq emdeýge jiberilgen jáne sozylmaly aýrýlary bar naýqastardy baqylaityn bolady. Oblys ákimi Berdibek Saparbaev qazir naqty sharalar qabyldap, koronavirýstyń pandemiiasynyń sozylý jaǵdaiyna daiyndyqty búginnen bastaý qajettigin basa aitty.
- Qazirgi tańda dárihanalarda virýsqa qarsy jáne dene qyzýyn túsiretin dárilerdiń jetispeýshiligi ózekti bolyp tur. Mundai jaǵdai búkil oblys boiynsha baiqalýda. Bul máseleni sheshý úshin jaýapty vedomstvolar salalyq ministrlikpen, «SK-Farmatsiia» kompaniiasynyń ókilderimen birlesip jumys isteýi tiis. Halyq arasynda túsindirý jumystaryn júrgizip, joq preparattardyń analogtary týraly habardar etý kerek. Maskamen qamtamasyz etý máselesi de kún tártibinen túspeidi. Moiynqum, Sarysý jáne T.Rysqulov aýdandarynda maskalardyń belgilengen baǵadan qymbatqa satylyp jatqandyǵy anyqtalǵan. Ákimderge bul sekildi máselelerdi jedel sheshýdi tapsyramyn, - dedi aimaq basshysy.
Berdibek Saparbaev koronavirýstyń aldyn alý boiynsha aqparattyq jumysty kúsheitý qajettigin atap ótti.
- Memleket basshysy Qasym-Jomart Toqaev aýrýǵa shaldyqqan kezdegi áreketterdiń algoritmi týraly halyqty ýaqtyly jáne sapaly aqparatpen qamtamasyz etýdi tapsyrdy. Dárigerler keńesterin onlain rejimde, call-ortalyqtar jáne buqaralyq aqparat quraldary arqyly berýin uiymdastyrý qajet, - dedi oblys ákimi.
Sondai-aq, meditsina qyzmetkerleriniń jetispeýshiligine bailanysty rezidentýrada oqityn stýdentterdi, zeinet jasyndaǵy dárigerlerdi tartý máseleleri saralandy. Marat Jumanqulov bul baǵyttaǵy jumystar qazirdiń ózinde júrgizilip jatqandyǵyn aitty.
- Tósek sanyn kóbeitý boiynsha da sharalar qabyldanatyn bolady. Biz ahýaldy baqylaýda ustap, kez kelgen jaǵdaiǵa daiyn bolýymyz kerek. Adamdar jedel járdem jumysyna jáne aýrýhanalarda oryndardyń joqtyǵyna qatysty shaǵymdanýda. Mundaiǵa jol bermeý kerek. Árbir azamat sapaly meditsinalyq qyzmetpen qamtylýy tiis. Bul oraida epidemiologiialyq ahýaly qalypty aýdandardyń meditsina qyzmetkerleri qol ushyn sozǵany durys, - dep atap ótti aimaq basshysy.
Basqosý sońynda Berdibek Saparbaev jambyldyqtardy sanitarlyq dárigerlerdiń usynystaryn ustanýǵa shaqyryp, úndeý joldady.
