QR Táýelsizdiginiń 30 jyldyǵy men eki márte Sotsialistik Eńbek Eri Jazylbek Qýanyshbaevtyń 125 jyldyǵyna orai Jambyl oblysynda Qazaqstan malshylarynyń respýblikalyq sleti ótti, dep habarlaidy "Ult aqparat" aimaq ákimdiginiń baspasóz qyzmetine silteme jasap.
Respýblikalyq malshylar sleti aiasynda Tarazda «Aýyl sharýashylyǵy» skveriniń, danqty shopan beinelengen bareleftiń ashylýy, M.H.Dýlati atyndaǵy Taraz óńirlik ýniversitetinde J.Qýanyshbaevqka arnalǵan birinshi respýblikalyq ǵylymi-praktikalyq konferentsiia ótti.
T.Rysqulov aýdanynda asyl tuqymdy aýyl sharýashylyǵy janýarlary men aýyl sharýashylyǵy tehnikasynyń kórmesi ótti.
«Danqty shopan Jazylbek Qýanyshbaev soǵystan keiingi jańa ómirdiń qalyptasýyna ólsheýsiz úles qosty. Ol alǵashqylardyń biri bolyp qarakól qoiyn ósirýdi qolǵa aldy. Biyl óńirde birqatar is-shara josparlanǵan. «Jalpaq jurttyń Jaz atasy» kitabynyń tusaýy kesildi», - dedi jiynda oblys ákimi Berdibek Saparbaev.
Kórmege asyl tuqymdy buqalar, jylqylar, golshtein-friz jáne shveitsariialyq siyrlar, sondai-aq jańa aýyl sharýashylyǵy tehnikalary usynyldy.
Basqosý barysynda mal sharýashylyǵyn, agroónerkásip keshenin damytýdyń keń aýqymdy máseleleri, Qazaqstan Respýblikasynyń agroónerkásiptik keshenin damytýdyń 2021-2025 jyldarǵa arnalǵan ulttyq jobasyn iske asyrý tetikteri talqylandy.
Aýyl sharýashylyǵy basqarmasynyń málimetinshe, búginde oblysta mal basy artýda, naqtyraq aitsaq: iri qara sany – 10,7 paiyzǵa, usaq mal – 3,7 paiyzǵa, jylqy – 5,2 paiyzǵa, túie – 7,5 paiyzǵa ósken.
Qonaqtarǵa arnalyp sport jáne mádeni sharalar uiymdastyryldy.
Kórme túrli nominatsiialar boiynsha jeńimpazdardy saltanatty túrde marapattaý rásimimen túiindeldi. Sala ardagerleri Aýyl sharýashylyǵy ministrliginiń «Eńbek ardageri» jáne «Aýyl sharýashylyǵy salasynyń úzdigi» tósbelgilerimen marapattaldy.
«Mundai deńgeide malshylardyń sleti alǵash ret ótip otyr. Biz ózekti máselelerdi talqylaýǵa, tájiribe almasýǵa múmkindik aldyq. Elimizdiń jáne oblys basshylyǵyna kórsetken qoldaýy men yqylasy úshin alǵysymyzdy bildiremiz», - dedi «Úzdik shopan» nominatsiiasyn jeńip alǵan T.Rysqulov aýdanynan kelgen Seitbek Dúisenov.
Oblys ákimi Berdibek Saparbaev sharýa qojalyqtyń ozat shopany men jylqyshysyna 15 million teńge kóleminde sertifikat tabys etti. Bul qarjy olardyń otbasy úshin turǵyn úi salýǵa jumsalmaq. Sondai-aq, aimaq basshysy «Jyly bulaq Merki» sharýa qojalyǵynyń shopanyna «Lada Vesta» avtokóliginiń kiltin tabystady.
Bul kúni Tarazda sletke qatysýshylar «Qazaqtyń qara shaly» filmin jáne A.Toqpanov atyndaǵy Jambyl oblystyq qazaq drama teatrynda eki márte Sotsialistik Eńbek Eri atanǵan J. Qýanyshbaev pen Y. Jaqaev týraly teatrlandyrylǵan qoiylymdy tamashalady.
