Jambyl oblysynda muǵalimder «Spýtnik V» vaktsinasyn qabyldai bastady, dep habarlaidy "Ult aqparat".
Taraz qalalyq emhanalarynda jalpy bilim beretin orta mektepterdiń pedagogtaryna koronavirýs infektsiiasyna qarsy «Spýtnik V» vaktsinasyn egý bastaldy. Ony alǵashqylardyń biri bolyp oblystyq bilim basqarmasy basshysynyń mindetin atqarýshy Jámila Bekbatyrova saldyrdy.
Jambyl oblysy ákimdigi densaýlyq saqtaý basqarmasynyń baspasóz qyzmeti habarlaǵanǵandai, ol vaktsina qabyldar aldynda dárigerdiń tekserilýinen ótip, qarsy kórsetilimderi bolmaǵan soń, alǵashqy egýdi aldy. Dárigerdiń baqylaýynda 30 minýttai bolǵan Jámila Bekbatyrova ózin jaqsy sezinetindigin aitty.
№5 jáne «ZHANUYA» qalalyq emhanalarynda tań atqaly bastalǵan egý naýqanyna bilim salasynyń qyzmetkerleriniń barlyq toby óz erikterimen tolastamai kelýde. Osy kúni keshke deiin 45 adamǵa vaktsinatsiia jasalady dep josparlanǵan.
Óńirge Qaraǵandy farmatsevtikalyq zaýyty bazasynda óndirilgen «Spýtnik V» vaktsinasynyń 5250 dozasy jetkizildi. Vaktsina saldyratyndardyń tizimi jasalyp, emhanalarǵa berildi. Osy sanattaǵy adamdarǵa vaktsina salý úshin oblysta 20 emdeý mekemeleri, onyń ishinde Taraz qalasynda - 9, Shý qalasy jáne oblystyń 10 aýdandyq emhanalary jumys isteýde. Barlyq jumyldyrylǵan emhanalarda egý jumystaryn júrgizý sanitarlyq-epidemiologiialyq normalar men erejelerdiń talaptaryna sáikes júzege asyrylady.
Jambyl oblysy boiynsha aǵymdaǵy jyly vaktsinanyń túsýine qarai 18 jastan asqan 593700 adamdy COVID-19-ǵa qarsy vaktsinatsiialaýmen qamtý josparlanýda. Bul – oblys halqynyń jalpy sanynyń 52%-y. Budan basqa, keiinnen halyqtyń qosymsha osal toptaryn qosa otyryp, kontingentti keńeitý kózdelýde.
Qazaqstanda juqpaly aýrýlarǵa, onyń ishinde koronavirýstyq infektsiiaǵa qarsy vaktsinatsiia tegin, erikti túrde jáne vaktsinatsiialaýǵa niet bildirgen adamnyń aqparattandyrylǵan kelisimimen júrgiziledi. Koronavirýsqa qarsy immýndaý aǵymdaǵy jyldyń sońyna deiin jalǵasady.
