Jambyl oblysynda koronavirýsty anyqtaityn 3 myń ekspress test satyp alyndy, - dep habarlaidy Jambyl oblysy ákimdigi.
Aimaqta koronavirýs infektsiiasynyń taralý deńgeii turaqty. Alaida, shekteý sharalaryn qoldanýǵa bailanysty ózekti máseleler týyndaýda. Bul týraly beineselektorlyq rejiminde ótken oblystyq jedel shtab otyrysynda aityldy. Shtab basshysy, oblys ákimi Berdibek Saparbaev qaýipti infektsiia anyqtalǵan azamattar oqshaýlanyp, qajetti meditsinalyq kómek alyp jatqandyǵyn, olardyń densaýlyq jaǵdailary turaqty ekendigin atap ótti.
Sondai-aq, basqosýda oblys ákiminiń orynbasary Erjan Jylqybaev koronavirýs infektsiiasyna qarsy sharalar týraly aqparatpen bólisti.
6 sáýirdegi ahýalǵa sáikes oblys boiynsha 2 000-ǵa jýyq adam karantinge alynǵan. Onyń karantin rejimdegi gospitalda jatqany 1190 adam bolsa, úi karantinine 813 adam oqshaýlanǵan. Anyqtalǵandai, infektsiia tabylǵandardyń barlyǵy derlik respýblikanyń basqa aimaqtarynda jáne shetelde bolyp kelgender. Oblys boiynsha naýqas jáne aýrýǵa kúdikti azamattar úshin 1 364 tósek-oryn daiyndalǵan, onyń 490-y rezervte tur. Infektsiianyń jappai taralýynyń aldyn alý maqsatynda QR Úkimetiniń rezervinen Jambyl oblysyna meditsinalyq preparattardy satyp alýǵa 536,9 mln teńge bólingen. 3 myń ekspress test satyp alyndy. Óńirdegi farmatsevtikalyq fabrikada jáne shaǵyn tsehtarda meditsinalyq maska shyǵarylýda.
B. Saparbaev dál qazir barynsha jedel ári batyl áreket etetin sát ekendigi alǵa tartty. Mundai jaǵdaida salǵyrttyq jol berilmeý kerektigin, sonymen qatar, pandemiia áli shyrqaý shegine jetpegendigin tilge tiek etip, jumyla jumys jasaý, kúsheitilgen rejimde áreket etý qajettigin basa aitty.
Ol sondai-aq birinshi kezektegi qajetti azyq-túlik baǵasyn turaqty monitoringileý mańyzdylyǵyna nazar aýdardy. Memleket birqatar áleýmettik mańyzy bar ónimderge shekti baǵany engizdi.
