Jambyl oblysynda turǵyn úi kezeginde turǵan turmysy tómen jáne kópbalaly otbasylar úshin 10 jataqhana salynady, dep habarlaidy "Ult aqparat".
«Jataqhananyń 7-ýi oblys ortalyǵynan, 3-ýi Shý, Qarataý, Jańatas qalalarynda salynady», - dep málim etti kópbalaly analarmen kezdesken oblys ákimi Asqar Myrzahmetov.
Onyń aitýynsha, óńirdegi az qamtylǵan jáne kópbalaly analarǵa qajetti kómek kórsetiledi, ol úshin biýdjetten 30 mlrd teńge bólingen.
Turmysy tómen jáne kópbalaly otbasylardan shyqqan 29 myń balaǵa mektepte tamaqtandyrýǵa 2 milliard teńge, formasyn alyp berý úshin 500 million teńge bólinýde. Budan bólek, 23 myń oqýshyǵa jazǵy saýyqtyrý lagerlerine tegin joldama berilmek.
«Az qamtylǵan jáne kópbalaly otbasynan shyqqan oqýshylar men túlekter úshin de aitarlyqtai jeńildikter jasalynady. Aitalyq, biyl kolledjderge bólinetin 13 myń granttyń 50 paiyzy az qamtylǵan jáne kópbalaly otbasynyń balalaryna tiesili bolmaq. Iaǵni, 6 jarym myńǵa jýyq stýdent memleket esebinen kolledjderde tegin oqytylady. Olardyń shákirtaqysy men tamaqtanýyna 1,7 milliard teńge qaralmaq», - dedi oblys ákimi.
Sondai-aq, oblystaǵy 7 500 az qamtylǵan jáne kópbalaly otbasylardyń kommýnaldyq tólemderin tólep berý úshin 500 million teńge bólý josparlanýda.
Oblys ákimi az qamtylǵan jáne kópbalaly otbasylardyń 70 paiyzy aýylda turatynyn eskerip, olarǵa demeýshiler esebinen qaitarymsyz mal berý qaiyrymdylyq sharalary da qarastyrylyp jatqanyn aitty. Sonymen qatar, áleýmettik qoldaý kórsetý úshin qurylatyn arnaiy komissiia quramyna da kópbalaly analar qosylady.
