Jambylda esirtki daiyndaýmen jáne ótkizýmen ainalysqan qylmystyq top ustaldy, dep habarlaidy QazAqparat.
Qylmystyq top respýblikalyq «Qarasora-2021» jedel aldyn alý is-sharasy, sondai-aq «Refleks-2021» óńirlik operatsiiasyn ótkizý barysynda anyqtaldy. Olardy Jambyl oblysy Politsiia departamenti Esirtki qylmysyna qarsy is-qimyl basqarmasynyń jáne Ulttyq qaýipsizdik komiteti departamentiniń qyzmetkerleri birlesip ustady. Qylmystyq top Jambyl oblysynyń aýmaǵynda «marihýana» daiyndaýmen jáne ony basqa óńirlerge satýmen ainalysqan. 39 jáne 51 jas aralyǵyndaǵy barlyǵy 5 kúdikti anyqtaldy. Atalǵan er adamdardyń tórteýi – Baizaq aýdanynyń turǵyndary, bireýi Taraz qalasynan.
«Olardyń turǵylyqty jeri boiynsha, sondai-aq kúdiktilerdiń biriniń óndiristik bazasyna tintý jasap, bir mezgilde júrgizilgen ustaý operatsiiasy barysynda jalpy salmaǵy 1 keliden astam gashish, 30 keliden asatyn marihýana, ósirilgen kannabis ósimdiginiń butalary, ileýish quraly jáne gashish óndirýge arnalǵan basqa da qurylǵylar, sondai-aq tirkelmegen 2 tegis uńǵyly myltyq, 25 ańshylyq jáne 16 travmatika patrondary tárkilendi. Qazirgi ýaqytta ustalǵandardyń barlyǵy kinásin moiyndady. Olar Taraz qalasy Politsiia basqarmasynyń ýaqytsha ustaý izoliatoryna qamaldy», – dep atap ótti Esirtki qylmysyna qarsy is-qimyl basqarmasynyń bastyǵy Asqar Jumabekov.
Atalǵan qylmystyq is boiynsha tájiribeli qyzmetkerlerden jedel tergeý toby quryldy, sotqa deiingi tergeý amaldary júrgizilip jatyr.
