Endi óńirdiń órkendeýine ólsheýsiz úles qosyp, eleýli eńbek etkender «Oblysqa sińirgen eńbegi úshin» belgisimen marapattalatyn bolady. Ol oblys ákiminiń nagradasy bolyp sanalady. Bul týraly oblys ákimdiginde arnaiy jiyn ótip, tósbelgi úlgisi tanystyryldy.
Óńir basshysy Asqar Myrzahmetovtyń tóraǵalyǵymen ótken basqasýǵa basqarma basshylary, aýdan ákimderi, ziialy qaýym ókilderi men ardagerler uiymynyń ókilderi qatysty. Asqar Isabekuly oblysymyzda 1 millionnan asa halyq turatynyn, onyń ishinde aimaqtyń damýyna zor úles qosyp, talai jyldar boiy talmai ter tókken ásirese aǵa býynnyń ókilderi az emestigin atap aitty. Bul belgi sol azamattardyń eńbegin eskerip, mártebesin arttyrýǵa, sol arqyly ózgelerge úlgi–ónege bolýǵa negizdelýde.
Jiynda oblys ákiminiń birinshi orynbasary Bekbolat Orynbekov «Oblysqa sińirgen eńbegi úshin» belgisiniń mán-mańyzy men sipattamasyna toqtalyp, slaid arqyly onyń bekitilgen úlgisimen tanystyrdy. Onyń aitýynsha, oblys ákiminiń bul nagradasy azamattardyń oblysqa sińirgen airyqsha eńbegin, ekonomikany, áleýmettik, qoǵamdyq salalardy, ǵylym men mádenietti, sportty damytýǵa qosqan eleýli úlesin, quqyq qorǵaý organdaryndaǵy úlgili qyzmetin, belsendi qaiyrymdylyq isin baǵalaýdyń belgisi retinde resmi kótermeleý men moraldyq yntalandyrý maqsatynda taǵaiyndalady.
Ol oblystyń, elimizdiń basqa óńirleri men ózge memleketterdiń azamattaryna, sondai-aq, óńirdiń damýyna óz úlesterin qosqan Qazaqstannyń memlekettik jáne qoǵam qairatkerlerine tabys etiletin bolady. Belgimen nagradtaý oblys ákimi apparaty basshysynyń jazbasha qorytyndysy boiynsha oblys ákiminiń ókimine sáikes júzege asyrylady. Qajet bolǵan jaǵdaida, oblys ákimi Belgimen nagradtaýǵa oblystyń memlekettik organdary basshylarynyń, qala jáne aýdan ákimderiniń, qoǵamdyq qurylymdardyń usynymdaryn qaraý jáne usynystar ázirleý jónindegi arnaiy komissiia qurýy múmkin. Belgi men onyń kýáligin oblys ákimi, sondai-aq oblys ákimi ýákilettik bergen tulǵalar tabys etedi. Tabys etý saltanatty jaǵdaida ótedi.
Aita ketý kerek, buǵan deiin eńbegimen kózge túskender oblys ákiminiń Qurmet gramotasy, Alǵys hatymen marapattalyp kelse, endigi ýaqytta onyń qataryn «Oblysqa sińirgen eńbegi úshin» belgisi tolyqtyrady. Bul jańa belgide oblys esimin enshilep jatqan aqyn, jyr alyby Jambyl Jabaevtyń beinesi belgilengen.
Naqtyraq toqtalsaq, belgi – altyn tústes, mys-myrysh qorytpasy – jezden jasalǵan, 34 mm durys sheńberden jáne negizden turady. Negiz eni 20 mm kógildir tústi jibek mýar lentasymen qaptalǵan. Belginiń aldyńǵy jaǵynda Jambyl oblysynyń kontýralyq kartasynyń aiasynda, Jambyl aqynnyń eskertkishiniń keskini beinelengen. Aqyn oń qolyn sozyp tur, sol qolynda dombyra bar.
Belgi shetiniń ústińgi jaǵynda «OBLYSQA SIŃIRGEN EŃBEGI ÚShIN» jazý dóńgelektenip jazylǵan, al belginiń tómengi bóliginde qazaq ulttyq oiýy salynǵan. Basqosý barysynda oblystyń Qurmetti azamaty, «100 jańa esim» jobasynyń jeńimpazy Sembek Seidázimov, oblystyq ardagerler keńesiniń tóraǵasy Erkinbek Soltybaev, jazýshy, halyqaralyq «Alash» ádebi syilyǵynyń iegeri Nesipbek Dáýtaev, qoǵam qairatkeri Jandar Káribaev, mádeniettanýshy Álibek Ámzeev, Taraz qalasynyń Qurmetti azamaty Qarjaýbai Bekbolat jáne basqalar sóz alyp, belginiń mazmundylyǵyna toqtalyp, oramdy oilaryn ortaǵa saldy.«Oblysqa sińirgen eńbegi úshin» belgisiniń alǵashqy iegerleri Táýelsizdik merekesi qarsańynda ótetin saltanatty sharada marapattalmaq.
Bul marapatqa búginde Taraz qalasy men aýdandardan 900-den astam usynys túsken. Asqar Isabekuly laiyqty tulǵalardyń nazardan tys qalmaýyn qadaǵalaýdy, kerek jaǵdaida tizimdi taǵy da tolyqtyrýǵa bolatynyn jetkizdi.
Sondai-aq, keler jyly oblystyń 80 jyldyq mereitoiy barysynda ózge de laiyqty azamattar atalmysh nagradany keýdesine taǵady jáne aldaǵy ýaqytta ol turaqty túrde tabystalatyn bolady.
