Jambyl oblysynyń ákimi Berdibek Saparbaev Tarazda ótken brifing barysynda Baizaq aýdanyndaǵy áskeri qoimalardaǵy jarylystardyń sebebin tergeý týraly baiandap berdi, dep habarlaidy QazAqparat.
Aimaq basshysy 26 tamyzda 28349 áskeri bóliminiń aýmaǵynda bolǵan órt pen jarylystar kezinde 17 adam qaza taýyp, bir adam iz-túzsiz joǵalǵanyn atap ótti. Qaza bolǵandardyń arasynda tótenshe jaǵdailar departamenti, prokýratýranyń ókilderi, áskeri qyzmetshiler bar.
«Tótenshe oqiǵa kezinde bir azamattyń iz-túzsiz joǵalǵanyn atap ótkim keledi. Alaida ony izdeý jumystary áli de jalǵastyrylýda. Men «Ońtústik» aimaqtyq qolbasshylyǵymen únemi bailanystamyn. Sharaǵa qansha maman, tehnika, saperler, qyzmettik itter jumyldyrylǵany týraly máselelerdi qadaǵalap júrmin. Izdeý-barlaý sharalary jalǵasýda. Men joǵalǵan adamnyń ata-anasymen de bailanystamyn», - dedi Berdibek Saparbaev.
Tótenshe oqiǵa sebepterine toqtala ótken óńir basshysy bul máseleniń barlyǵyn mazalaitynyn atap ótti.
«Memleket basshysynyń tapsyrmasymen Bas prokýratýra jáne Ishki ister ministrligi mamandarynan qurylǵan tergeý toby qurylǵan. Tergeý qorytyndylary aiaqtalǵan soń resmi túrde jariia etiledi. Oqiǵanyń sebebi, sondai-aq oǵan kináli bolǵandar sol kezde belgili bolady. Sondyqtan jerlesterimdi qandai da bir teris aqparat jáne ósek-aiańǵa senbeýin suraimyn. Naqty aqparatty arnaiy qurylǵan shtabtan alýǵa bolady», - dep atap ótti Saparbaev.
Eske sala ketsek, Jambyl oblysy Baizaq aýdanynyndaǵy Qainar aýylynyń janynda ornalasqan áskeri bólimdegi qoimalardyń biriniń janynda áýeli órt bastalyp, odan keiin birneshe jarylys bolǵan. Órttiń shyǵý sebepteri anyqtalýda.
Jambyl oblysyndaǵy jarylystan qaza bolǵandar sany 17 adamǵa jetti.
Qazaqstan Prezidenti Qasym-Jomart Toqaev 29 tamyzdy Jalpyulttyq aza tutý kúni dep jariialaǵan.
Qazirgi kezde Baizaq aýdanynda qalpyna keltirý jumystary júrgizilýde.
