Memleket basshysynyń Jambyl oblysynda bolǵan jarylystarǵa bailanysty kómek kórsetý jáne qalpyna keltirý jumystaryn júrgizý tapsyrmasy boiynsha birqatar shara atqarylǵan, dep habarlaidy "Ult aqparat" Prezidenttiń baspasóz hatshysy Berik Ýálige silteme jasap.
«Memleket basshysy Qasym-Jomart Toqaev 2021 jylǵy 27 tamyzda Jambyl oblysynda bolǵan jarylystarǵa bailanysty shuǵyl jinalys ótkizip, memlekettik ýákiletti organdarǵa qaza tapqan azamattardyń otbasylaryna jan-jaqty kómek kórsetýdi jáne qalpyna keltirý jumystaryn júrgizýdi tapsyrdy.
Oryndaldy:
• Jarylys saldarynan qiraǵan 176 nysannyń búginde 173-i qalpyna keltirildi. 35 turǵyn úi, 10 komertsiialyq nysan, 2 mektep pen 1 dárigerlik pýnkt paidalanýǵa berildi. 2 kommertsiialyq nysannyń jáne Jibek joly aýylyndaǵy 150 oryndyq jańa mekteptiń qurylysy júrgizilip jatyr.
• Qainar aýylynda joldar jóndelip, kósheler jaryqtandyryldy, úilerge gaz, sý berildi.
• Qaita qalpyna keltirý jumystaryna Úkimet rezervinen 1,2 mlrd. teńge bólindi jáne demeýshiler esebinen 102,3 mln. teńge jumsaldy.
• Qaza tapqan azamattardyń otbasylaryna 15 mln teńgeden materialdyq kómek kórsetildi.
• Qaza tapqan azamattardyń otbasy músheleriniń bankter men mikroqarjy uiymdary aldyndaǵy qaryzdary tolyǵymen óteldi», delingen habarlamada.
