© Photo: pixabay
Jambyl oblysyndaǵy aýrýhanalardyń birinde náreste kóz jumdy. Sebebi - belgisiz. Shý aýdanynyń turǵyny egiz balasynyń dene ystyǵy kóterilip, jóteli tyiylmaǵan soń medininalyq mekemege júgingen, - dep habarlaidy "Ult aqparat" "Almaty" telearnasyna silteme jasap.
Beinejazbada 7 ailyq egizder Eva men Dariianyń Shý aýdandyq aýrýhanasynda jatqanyny anyq kórinedi. Munda jótel men dene qyzýyna bailanysty túsken. Nárestelerdiń anasynyń aitýynsha, balalardyń biri tamaqty qyzdyrý em sharasynan keiin qan qusa bastaǵan. Oblys ortalyǵynan kelgen dárigerler em jasaǵanymen, nátije shyqpapty. Náresteniń qandai kinárattan qaza tapqanyn dárigerler naqty aitpai otyr.
"Tańerteń balanyń ishi isine bastady. Bizge zond jáne tynys alý apparatyn ornatqan bolatyn. Dál sol zond arqyly murynnan qan shyǵyp otyrǵan. Túni boiy bizge birde-bir dáriger jaqyndap, jaǵdaiymyzdy suramady. Al Tarazdan kelgen mamandar em qabyldai bastaǵanda, balapanymnan aiyrylyp qaldyq", - dedi qaitys bolǵan balanyń anasy Aleksandra Semionova.
Al egizdiń syńary qazir Taraz qalasyndaǵy emhanada jatyr. Dárigerler balada pnevmoniia bar dep, arnaiy meditsinalyq aviatsiia arqyly oblys ortalyǵyna aldyrtqan. Onyń da jaǵdaiy múshkil. Aq halattylardyń aitýynsha, tiisti em-dom jasap jatyr.
"Bizge 10 sáýirde saǵat 20:00-de Shý aýdandyq aýrýhanasynan Semenova Eva esimdi 7 ailyq qyz aýystyryldy. Aýysqan kezde jaǵdaiy ortasha hálde tústi. Kórsetip jatqan em-sharalar hattama boiynsha júrgizilip jatyr", – dedi Balalar aýrýhanasynyń bólim meńgerýshisi Perizat Halyqova.
Al oblystyq Densaýlyq saqtaý departamenti balanyń ólimi jaily aqparat berýden bas tartty. Sebebi tekserý is-sharasy aiaqtalmaǵan. Al politsiia sotqa deiingi tergeý amaldary bastalǵanyn habarlady.
"Atalǵan fakt tirkeldi. Sotaldy tergeý amaldary bastaldy. Balanyń denesi máiithanaǵa jiberildi, sot-meditsinalyq zertteý taǵaiyndaldy. Qazir jan-jaqty tergeý júrgizip jatyr", – dedi Jambyl oblystyq Politsiia departamenti baspasóz qyzmetiniń bastyǵy Gúlsara Muhtarqulova.
