Jambyl oblysyndaǵy "Andas batyr" shekara bóliminen joǵalyp ketken sarbaz óli tabyldy, - dep habarlaidy Tengrinews.kz tilshisi 24.kg saityna silteme jasap.
Sait málimetinshe, Shý oblysynyń ortalyq ishki ister bas basqarmasy qazaqstandyq sarbaz Ulyqbek Berdishovtiń ólimine qatysty pikir bildirgen.
"10 sáýirde saǵat 17:40 shamasynda Panfilov Ishki ister departamentiniń kezekshi bólimine memlekettik shekara mańynda 20-25 jastaǵy er adam óli tabylǵany týraly habarlama túsken. Oqiǵa ornyna barǵan tártip saqshylary jartasta óz beldigine asylǵan máiitti tapty. Fakt aqparatty tirkeý jýrnalyna tirkeldi", - delingen habarlamada.
Vedomstvo málimetinshe, marqum 19 jastaǵy Qazaqstan azamaty B.U. ekeni anyqtalyp, saraptama taǵaiyndalǵan.
Eske salaiyq, buǵan deiin Jambyl oblysyndaǵy "Andas batyr" shekara bóliminde áskeri boryshyn ótep júrgen sarbazdy týystary bir aidan astam ýaqyt boiy izdestirip jatqany habarlanǵan bolatyn.
Ulyqbek Berdishovtiń anasy Orynkúl Merekova uly joǵalyp ketkenin esti sala, Qyzylorda oblysy Qazaly aýdanynan Andas batyr aýylyna kelip, sonda úi jaldap, ulyn izdeýge kirisken.
"Men eshqaida ketpeimin. Ana júregim, balam jaqyn jerde ekenin aitty, men ony izdeimin", - dedi anasy kózine jas alyp.
