Qazaqstan men Resei mineraldy tyńaitqysh shyǵarý jobasyn júzege asyrý týraly úkimetaralyq kelisimge qol qoidy, dep habarlaidy "Ult aqparat" Syrtqy ister ministrligine silteme jasap.
Qazaqstan men Resei Jambyl oblysynda mineraldyq tyńaitqysh shyǵaratyn zaýyt salý jáne ony paidalaný boiynsha «EýroHim» mineraldy-himiialyq kompaniiasy» jobasyn iske asyrý týraly úkimetaralyq kelisimge qol qoidy.
Joba Qazaqstan Respýblikasynyń ońtústigindegi Qarataý fosfor basseininiń ken oryndaryn igerýdi jáne mineraldyq tyńaitqysh shyǵaratyn jańa zaýyt salýdy kózdeidi. Jobanyń jalpy quny - 1,2 milliard AQSh dollary.
«Himiialyq kásiporynnyń jumysy Jambyl oblysynda keminde 1200 jańa jumys ornyn ashýǵa múmkindik beredi, sonymen qatar aýyl sharýashylyǵy men qurylys salasynyń damýyna aitarlyqtai túrtki bolady, azyq-túlik qaýipsizdigin joǵarylatýǵa, Qazaqstan Respýblikasynyń eksporttyq áleýetin arttyrýǵa yqpal etedi, Qazaqstan men Resei arasyndaǵy integratsiialyq biznes-bailanysty eleýli túrde nyǵaitady», - dep túsindirdi Ermek Kósherbaev.
Salynǵaly jatqan himiialyq kásiporynda dástúrli fosfor óndiristeriniń negizgi kemshilikteriniń biri - fosforly gips túrindegi qaldyqtar bolmaidy, bul tabiǵi resýrstardy paidalaýdyń tiimdiligin jaqsartyp, óńir ekologiiasyn saqtaidy. Budan basqa, joba onyń barlyq qatysýshylaryna uzaqmerzimdi áleýmettik-ekonomikalyq áser ákelmek.
«Qol qoiylǵan úkimetaralyq kelisim strategiialyq investitsiialyq jobany iske asyrýda jańa kezeńdi bastaidy – jumys istep turǵan óndiristi keńeitip, himiia salasyndaǵy eń úzdik qoljetimdi tehnologiialardy paidalanýmen jylyna keminde 1 million tonna mineraldy tyńaitqysh pen indýstriialyq ónimder óndiretin jańa zaýyttyń qurylysyn bastaýǵa kóshýge múmkindik beredi. Zaýyttyń qurylysyn 2025 jylǵa qarai aiaqtaý josparlanyp otyr», - dep atap ótti Denis Mantýrov.
Bul joba Respýblikalyq indýstriialandyrý kartasyna engizilgen jáne 2019 jylǵy sáýirde Sarysý aýdanynda zaýyttyń muqtajdyqtary úshin qýattylyǵy 110 myń sharshy m/saǵ. gaz qubyrynyń qurylysy bastalǵan. Investitsiialyq jobany «EýroHim» mineraldyq-himiialyq kompaniiasy» AAQ-tyń Qazaqstandaǵy enshiles kompaniiasy «Eýrohim – Qarataý» JShS iske asyrady.
Búgingi kúni «EýroHim» fosforit ken ornyn barlaý jáne igerý, jyl saiynǵy qýaty 640 myń tonna fosforit unyn óndirý boiynsha taý-ken keshenin paidalanýǵa berý jónindegi jobanyń birinshi kezeńin iske asyrýdy tabysty aiaqtady.
«Bizdiń elderimiz arasyndaǵy saýda-ekonomikalyq qarym-qatynastar qarqyndy damýda. Qol qoiylǵan kelisim bizdiń integratsiiany tereńdetý boiynsha taǵy bir dáiekti qadam. Pandemiiaǵa qaramastan, Qazaqstandaǵy jobamyzdyń iske asyrylýy jalǵasýda. Biz qazaqstandyq áriptesterimiz kórsetetin qoldaý men ashyqtyqty óte baǵalaimyz, sondai-aq Resei tarapynan bir maǵynaly qoldaý kórsetkenderi úshin alǵys bildiremiz», - dep atap ótti «EýroHim» kompaniiasynyń bas direktory Igor Nechaev.
«KAZAKH INVEST» UK» AQ mamandary atap ótkendei, óndiriske josparlanǵan ónimdi qazaqstandyq fermerler tyńaitqysh retinde, sondai-aq qus jáne mal sharýashylyǵyndaǵy jem qospalarynda belsendi túrde paidalanady.
«Joǵary sapaly mineraldy tyńaitqysh qazaqstandyq sharýalar arasynda úlken suranysqa ie. Búginde qazaqstandyqtar paidalanatyn ónim – 100% importtyq. Importty almastyrý fermerlerge tyńaitqysh pen jem qospasyn qoljetimdi baǵada satyp alýǵa múmkindik beredi, bul óz kezeginde aýyl sharýashylyǵy ónimderiniń baǵasy men sapasyna oń áser etedi», - dep atap ótti «KAZAKH INVEST» UK» AQ joba jetekshisi Diliara Tektigulova.
Investorlardyń aitýynsha, ishki naryqtyń qajettiligin qamtamasyz etýmen qatar, Resei Federatsiiasyna, sondai-aq Qytaiǵa, Ortalyq jáne ońtústik-shyǵys Aziia, Taiaý Shyǵys elderine qosylǵan quny joǵary ónim eksportyn uiymdastyrý josparlanýda.
Aita keteiik, «EýroHim» - mineraldy tyńaitqysh óndiretin álemdik jekeshi kompaniialardyń biri. Kompaniia fermerlerdi aýyl sharýashylyǵy daqyldarynyń ónimdiligi men sapasyn arttyrý úshin qajetti jańa innovatsiialyq tyńaitqyshtarmen qamtamasyz etedi jáne turaqty damý printsipterin basshylyqqa alady.
Kompaniianyń óndiristik aktivteri tórt qurlyqta ornalasqan, al satý jáne distribýtsiia jelisi búkil álem boiynsha jumys isteidi. Qyzmetkerlerdiń sany 20 myńnan asady.
