Jambyl oblysynda jyl bastalǵaly beri 54 meditsina qyzmetkeri koronavirýs juqtyrǵan, - dep habarlaidy "Ult aqparat".
Óńirdegi koronavirýs infektsiiasynyń epidemiologiialyq jaǵdaiy týraly Jambyl oblysy ákiminiń orynbasary Erjan Jylqybaevtyń tóraǵalyǵymen keńes otyrysy ótip, onda qalyptasyp otyrǵan ahýal saralandy. Ókinishke qarai, búginde oblystaǵy Qordai, Jýaly aýdandary men Taraz qalasynda indet juqtyrǵandar azaimai tur. Sondyqtan talapty kúsheitý jaiy qaraldy.
«Meditsina salasynyń qyzmetkerleri, muǵalimder men oqýshylardyń syrqattanyp jatqany janǵa batady. Naqty sandarǵa júginsek, elimizde koronavirýs infektsiiasy taralǵaly beri oblys boiynsha – 411, onyń ishinde biyl 54 meditsina qyzmetkeri indet juqtyryp aldy. Syrqattanǵan azamattardyń 70 paiyzy jumys ornynan tys jerde juqtyrǵan. Dese de, densaýlyq saqtaý salasy mamandaryn qajetti qorǵanys kiimderimen qamtýǵa basa nazar aýdarý qajet. Bul maqsatta respýblikalyq biýdjetten 2 milliard 735 million teńge bólinip, oǵan maska, arnaiy kiimder sekildi kerek-jaraqtyń barlyǵy alyndy. Bul qor kún ótken saiyn tolyǵyp keledi. Máselen, sońǵy esep boiynsha aimaqta atalǵan zattardyń 77 kúnge jetetin mólsheri bar»,-dep jazdy Erjan Jylqybaev óziniń Feisbýk áleýmettik jelisindegi jeke paraqshasynda.
Sondai-aq, oblys ákiminiń orynbasary indetke qarsy turýdyń eń tiimdi joly – vaktsinalaý ekenin aitady. Ásirese, ekpe aýrýdyń oshaǵynda júrgen meditsina qyzmetkerleri úshin asa qajettigine airyqsha toqtalǵan.
«Jeltoqsan men qańtar ailarynda birqatar densaýlyq saqtaý salasy qyzmetkerleri erikti túrde ekpe saldyrǵan bolatyn. Budan bólek, jyl basynan beri aq halattylarǵa 850 doza vaktsina taǵy egildi. Nátijesinde aimaqta 1 180 maman vaktsinamen qamtyldy. Bul jumystardy jalǵastyrý maqsatynda kúni keshe qosymsha 5 250 doza ekpe taǵy jetkizildi. Jalpy 13 870 densaýlyq saqtaý qyzmetkerin vaktsinamen qamtý kózdelgen»,-dedi E. Jylqybaev.
Sonymen qatar, oblysta bilim salasy qyzmetkerlerin vaktsinalaý jumystary da bastaldy. Ekpe salý eń áýeli bastaýysh synyp muǵalimderine júrgiziledi. Ol úshin aidyń sońyna deiin taǵy 6 myń doza vaktsina alý josparlanǵan. Al ekpe egýdiń úshinshi kezeńinde stýdentterdi qamtý kózdelip otyr. Bul sharýalar densaýlyq saqtaý salasynyń mamandary men muǵalimderdiń arasynda aýrý taralýyn tejeýge óz áserin tigizbek.
Jiyn barysynda aimaqtaǵy koronavirýs infektsiiasynyń epidemiologiialyq ahýaly jáne Taraz qalasy men aýdandardaǵy monitoringtik toptardyń jumystaryn da talqylady.
