Jambyl oblysyndaǵy «Aisha-Bibi» oqý-jattyǵý poligonynda Qazaqstan men Úndistan áskeri qyzmetshileri arasynda «QazÚndi-2021» birlesken oqý-jattyǵýy ótýde. Bul týraly Qorǵanys ministrliginiń baspasóz qyzmeti habarlady.
Oǵan Qazaqstannan «Ońtústik» óńirlik qolbasshylyǵynyń bólimsheleri jáne Úndistannyń qurama rotaǵa biriktirilgen áskeri kontingenti qatysýda.
Birinshi kezeńde jeke quram jaýyngerlik daiarlyqtyń joǵary deńgeiine keltirý is-qimyldaryn pysyqtady. Halyqaralyq bólimshelerdiń áskeri qyzmetshileri daǵdarys aýdanyna marsh jasady. Qazirgi ýaqytta mejeli jerde rotalyq taktikalyq qurama top bólimshelerdi jaýyngerlik úilestirýdi oryndady.
Oqý-jattyǵý sheńberinde qosymsha bólimsheniń áskeri qyzmetshileri barlaý-izdestirý jáne reidtik is-qimyldar júrgizedi. Oqý-jattyǵýdyń sońǵy kezeńinde BUU-nyń mandatyna sáikes daǵdarys aimaǵynda zańsyz qarýlanǵan toptardy oqshaýlaý jáne joiý josparlanǵan.
«QazÚndi-2021» birlesken oqý-jattyǵýy Qazaqstan men Úndistan qorǵanys ministrlikteri arasyndaǵy ekijaqty yntymaqtastyq jospary sheńberinde ótkizilýde. Ol aǵymdaǵy jyldyń 10 qyrkúieginde aiaqtalady.
Oqý-jattyǵý sanitarlyq-epidemiologiialyq talaptardyń qatań saqtalýy arqyly ótýde. Oǵan qatysýshylar barlyq qajetti karantindik is-sharalardan, meditsinalyq tekseristen ótip, PTR-test tapsyrdy.
