Jambyl oblysynda joǵalyp ketken 7 jasar Erik Rysbaidy izdeý jumysy aiaqtaldy. Bala din aman, onyń ómirine eshqandai qaýip tónip turǵan joq, dep habarlaidy "Ult aqparat".
Jambyl oblystyq politsiia departamentiniń bastyǵy, politsiia general-maiory Janat Súleimenov kámeletke tolmaǵan balany aýqymdy izdestirý is-sharalaryn ózi basqardy.
Balany politsiia qyzmetkerleri men janashyr jergilikti turǵyndar Kókjilek aýylynda, qamys arasynan tapty. Ol keshe túnde sol jaqta túnep shyqqan. Bul týraly oblystyq politsiia departamentiniń baspasóz qyzmeti habarlady.
«Balany izdestirýge 400-den astam adam, onyń ishinde politsiia, ákimdik, tótenshe jaǵdailar departamenti qyzmetkerleri, eriktiler, sondai-aq TJD tikushaǵy jáne jergilikti orman sharýashylyqtarynyń biriniń AN-2 ushaǵy jumyldyryldy» delingen vedomstvo habarlamasynda.
Eske sala keteiik, buǵan deiin 15 qyrkúiek kúni Jambyl oblysy Moiynqum aýdanynda Kúsháman aýylynyń jeti jasar balasy úiden atpen shyǵyp, joǵalyp ketkendigin habarlaǵan bolatynbyz.
