Jambyl oblysynda ataýly áleýmettik kómek 14,5 mlrd teńge kóleminde 35 myń 497 otbasyna tólendi. AÁK taǵaiyndaý kezinde 9 myń 632 otbasy ózderiniń naqty tabysyn durys kórsetpedi. Endi olar 133,5 mln teńge qaitarýy tiis, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
Jambyl oblystyq jumyspen qamtýdy úilestirý jáne áleýmettik baǵdarlamalar basqarmasynyń aqparaty boiynsha júrgizilgen tekserý jumystary barysynda eń kóp taralǵan buzýshylyqtar tek naqty tabystardy ǵana emes, sonymen qatar biznesti, jyljymaityn múlikti, kólik pen maldy qasaqana jasyrý bolǵany anyqtaldy.
«16 mamyrda Merki aýdanynda turatyn kópbalaly otbasyna 1 mln 416 myń 588 teńge kóleminde AÁK taǵaiyndaldy. Turǵyn úiine, turmystyq jaǵdaiyna jáne atalǵan otbasynyń tabystaryna tekserý júrgizý kezinde olardyń jalpy aýdany 100 sharshy metrden asatyn jańa úide turatyndyǵy, materialdyq jaǵdaiy jaqsy, otaǵasy jeke kásipker ekendigi anyqtaldy. AÁK taǵaiyndaý kezinde 1-toqsanda kiris kólemi 415 myń 968 teńge dep kórsetilgen. Áleýmettik kómek alý zańdylyǵyn tekserý barysynda olardyń birinshi toqsanda 1 mln teńgeden astam tabys tapqany áshkerelendi», – dedi óńirlik Jumyspen qamtýdy úilestirý basqarmasynyń basshysy Timýr Nurymbetov.
Onyń aitýynsha, osyǵan uqsas faktiler óńirdiń basqa aýdandarynda da oryn alǵandyǵy anyqtaldy.
«Sondai-aq, mamyr aiynda Sarysý aýdanynyń alty adamnan turatyn otbasyna ai saiyn 110 myń 566 teńgeden, jalpy somasy 1 mln 326 myń 792 teńge kóleminde AÁK taǵaiyndaldy. Ýchaskelik komissiianyń qaita tekseris júrgizýi barysynda, alýshy kómek taǵaiyndaý kezinde birinshi toqsanda kásipkerlikten 127 myń 500 teńge tabys túsken dep kórsetken, shyn máninde onyń tabysy 500 myń teńgeden asyp ketken», – dedi Timýr Nurymbetov.
Ol sondai-aq áleýmettik kómekti zańsyz jolmen alý maqsatynda óńirdiń keibir turǵyndary naqty turatyn meken-jaiyn nemese ýaqytsha tirkelgen mekenjaiyn jasyrýǵa tyrysqanyn atap ótti.
Búgingi tańda zańsyz ataýly áleýmettik kómek alǵan Jambyl oblysynyń turǵyndarynan 27,1 million teńge óndirilip alyndy.
Esterińizge sala keteiik, AÁK taǵaiyndaý men tóleýdiń durystyǵyn monitoringileý nátijesinde 74 myńǵa jýyq ataýly áleýmettik kómek alýshynyń tabysy týraly jalǵan aqparat bergeni anyqtaldy.
Osyǵan bailanysty ministrlik ákimdiktermen birlese otyryp, árbir anyqtalǵan fakti boiynsha, buzýshylyqtarǵa jol bermeý jáne «Memlekettik ataýly áleýmettik kómek týraly» zańyn buza otyryp taǵaiyndalǵan tólemderdi qaita qaraý boiynsha jeke jumys júrgizýde.
Budan buryn habarlanǵandai, 7 qazanda QR Eńbek jáne halyqty áleýmettik qorǵaý ministri Birjan Nurymbetov QR Úkimetiniń otyrysynda 2020 jylǵy 1 qańtardan bastap muqtaj azamattarǵa ataýly áleýmettik kómek qalai kórsetiletinin aitqan bolatyn.
«Eń basty printsip – memleket kómekke muqtaj adamdarǵa, ásirese balalar men kópbalaly otbasylarǵa kómektesedi! Eńbekke qabiletti azamattar jumys isteýi kerek. Memleket jumysqa ornalasýǵa nemese shaǵyn biznespen ainalysýǵa kómektesedi. Memlekettik kómekke – kópbalaly otbasylardy qoldaý, tabysy tómen otbasylarǵa ataýly áleýmettik kómek kórsetý, tabysy az otbasylardaǵy balalarǵa kepildendirilgen áleýmettik paketi kiredi», – dedi Birjan Nurymbetov.
Ministrdiń aitýynsha, kópbalaly otbasylarǵa qoldaý kórsetý respýblikalyq biýdjetten memlekettik járdemaqylar engizý arqyly qamtamasyz etiletin bolady. Bul memlekettik járdemaqy barlyq kópbalaly otbasylarǵa (4 nemese odan da kóp kámeletke tolmaǵan balasy bar) tabysyna qaramastan tólenedi.
AÁK tabysy az otbasylarǵa, sonyń ishinde kópbalaly otbasylarǵa tólenetin bolady. Eń az kúnkóris deńgeiiniń 70%-y taǵaiyndaýdyń shekti kriteriii bolyp qala beredi. Eger eńbekke qabiletti otbasy múshesi usynylǵan jumystan jáne jumyspen qamtýǵa járdemdesý sharalarynan bas tartsa, onda AÁK tólemi tek oǵan ǵana emes, búkil otbasyna da toqtatylady.
Tabysy az otbasylardan shyqqan balalar úshin kepildendirilgen áleýmettik paketti engizý usynylady. 1 jastan 6 jasqa deiingi balalardy azyq – túlik jiyntyǵymen jáne gigienalyq quraldarmen, 6 jastan 18 jasqa deiingi balalardy mektepterde ystyq tamaqpen, oqý quraldarymen jáne mektep kiimimen qamtamasyz etedi, sondai-aq olarǵa mektepke deiingi jol júrý shyǵyndary óteletin bolady. Meditsinalyq, onyń ishinde stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde kórsetiletin bolady.
